Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 153 Hüküm no: 130 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın küçük çocukları için tahsis olunan nafakalarını düzenli olarak ödenmesi hususunda boşandığı eşine tenbihte bulunulması Ma‘denli Hüseyin Çavuş’a teslîm şüd. Ferikân-ı kirâm-ı Devlet-i aliyye’den sa‘âdetlü Mehmed Abdülhalim Paşa hazretlerinin kerîme-i muhteremeleri ve zikri câî sagīrlerin vâlideleri ve hâdıneleri derûn-ı arzuhâlde mezkûretü’l-ism Hadîce Hanım’ın li-ümmin ceddi ve tarafından husûs-ı âti’l-beyanda vekîl olduğu zât-ı mûmâ-ileyhâyı bi’l-ma‘rifeti’ş-şer‘iyye ârifân teba‘adan el-Hâc Selim Ağa b. Abdullah ve el-Hâc Mehmed b. Mehmed nâm kimesneler şehâdetleriyle ber-nehc-i şer‘î sâbit olan el-Hâc Ahmed Ağa b. Hasan mahfil-i şer‘iyyâtda müvekkil-i mûmâ-ileyhânın zevc-i sâbıkı Bâb-ı Seraskerî’de Mektûbî Odası hulefâsından ve rütbe-i sâlise ashâbından sâhib-i arzuhâl fütüvvetlü es-Seyyid Ali Rıza Efendi b. es-Seyyid Yahya Tevfik Efendi muvâcehesinde mûmâ-ileyh es-Seyyid Ali Rıza Efendi ile müvekkilem mûmâ-ileyhâ Hadîce Hanım’ın mukaddemâ zevciyet beynlerinde kāime iken mûmâ-ileyhin firâşından hâsıllar ve müvekkilem mûmâ-ileyhâdan mütevellidler sulbî oğulları Ali Remzi ve Zafer nâm sagīrlerin müvekkilem mûmâ-ileyhânın yedinde olup sene-i sâbıkā ya‘ni bin iki yüz yetmiş üç senesi Zilka‘deti’ş-şerîfesi’nin on dokuzuncu günü târîhiyle müverraha hâlâ Mahmudpaşa Mahkemesi nâibi mevâlî-i kirâmdan fazîletlü es-Seyyid İbrahim Halil Efendi’nin imzâ ve hatemini hâviye işbu bir kıt‘a hüccet-i şer‘iyye nâtıka olduğu üzere beher şehr üç yüz ellişer guruş nafaka-i müfevveze-i mukaddere ile müvekkilem mûmâ-ileyhânın bi-hakkı’l-hıdâne hâlâ hacr ve terbiyesinde olmağla târîh-i hüccet-i merkūmeden şehr-i sâbık şehr-i Rebî‘ülâhiri’nin on dokuzuncu gününe gelince beş mâh müddetde kadr-ı ma‘rûf nafaka-i mefrûza-i mukaddere-i müstedânesinden mûmâ-ileyh es-Seyyid Ali Rıza Efendi zimmetinde müctemi‘ olan bin yedi yüz elli guruşun bin elli guruşunu zahr-ı hüccet-i mezkûre mantûkunca üç def‘ada müvekkilem mûmâ-ileyhâya def‘ ü teslîm etmekle bâkīsi olan yedi yüz guruşu dahi bi’l-mürâca‘a müvekkilem mûmâ-ileyhâ için bana edâya mûmâ-ileyh es-Seyyid Ali Rıza Efendi’ye tenbîh olunmak murâdımdır deyü bi’l-vekâle da‘vâ etdikde, ol dahi cevâbında kazıyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf edip lâkin ber-mantûk-ı hüccet-i mezkûre sagīrân-ı mûmâ-ileyhânın nafaka ve kisve-bahaları için benim üzerime kıbel-i şer‘den farz ve takdîr olunan meblağ-ı mezkûr üç yüz elli guruş kadr-ı ma‘rûf olup lâkin meblağ-ı mefrûz-ı mezkûr üç yüz elli guruşu sagīrân-ı mûmâ-ileyhimâ için vâlideleri ve hâdıneleri müvekkile-i mûmâ-ileyhâya mâh-be-mâh edâ ve teslîmde giriftâr-ı zahmet ve meşakkat olduğuma binâen bir mikdârının hatt ü tenzîli murâdımdır deyü meblağ-ı mefrûz-ı mezkûr beher şehr üç yüz elli guruş [26b] kadr-ı ma‘rûf idüğü mukırr u mu‘terif iken tasaddî eylediği hatt ü tenzîl da‘vâsı takrîr-i meşrûhu üzere meşrû‘a ve iltifâta şâyân olmadığı kendüye ba‘de’t-tefhîm nafaka-i müterâkime-i merkūmeden bâkī kalan meblağ-ı mezkûr yedi yüz guruşu hâlâ ve ber-mantûk-ı hüccet-i mezkûre meblağ-ı mefrûz-ı mezkûr beher şehr üç yüz elli guruşu dahi beher şehr hitâmında sagīrân-ı mûmâ-ileyhimâ için vâlideleri ve hâdıneleri müvekkile-i mûmâ-ileyhâ için vekîl-i müdde‘î-i mûmâ-ileyh el-Hâc Ahmed Ağa’ya edâ ve teslîme mûmâ-ileyh es-Seyyid Ali Rıza Efendi’ye tenbîh olunduğu huzûr-ı [âlîlerine i‘lâm olundu]. Fî 6 Ca sene [12]74. Mustafa