Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 155 Hüküm no: 131 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı Sadık Ağa’nın Rukıye Hatun aleyhindeki miras ve eşya davasından men olunması Hademe-i Âsafî’den Hacı Mahmud Ağa kaydıyla vekîl-i mezbûr İlyas Bey’e teslîm şüd. Mahrûse-i Galata’ya muzâfe kasaba-i Beşiktaş’da Süleymaniye mahâllesinde sâkin iken işbu târîh-i i‘lâmdan yirmi gün mukaddem vefât eden Mekteb-i Harbiye-i şâhâne Vekîlharcı Hasan Efendi b. el-müteveffâ Silahdâr İsmail Ağa b. Abdullah’ın li-ebeveyn er karındaşı oğlu ve bu vechile verese-i münhasırasından bulunduğu mukaddemâ mahzar-ı hasm-ı câhidde bâ-hüccet-i şer‘iyye sâbit ve sübût-ı verâsetine hükm-i şer‘î lâhık olan sâhib-i arzuhâl Kayıkçı Sadık Ağa b. el-müteveffâ Mehmed Arif b. el-mezbûr Silahdâr İsmail Ağa nâm kimesne mahfil-i şer‘iyyâtda müteveffâ-yı mezbûrun zevce-i menkûha-i metrûkesi derûn-ı arzuhâlde mezkûretü’l-ism mu‘arrefetü’z-zât Rukıye Hatun bt. Abdurrahman tarafından husûs-ı âti’l-beyanda vekîl-i müseccel-i şer‘îsi es-Seyyid İlyas Bey b. Süleyman muvâcehesinde mûrisimiz müteveffâ-yı mezbûrun hîn-i vefâtında mahâlle-i merkūmede vâki‘ menzilinde mevcûde terekesi olup benimle zevce-i müvekkile-i mezbûre Rukıye Hatun’a mesele-i mîrâsımız üzere mevrûs olup ve bu def‘a mahâllinde ma‘rifet-i şer‘le mu‘âyene olunan mecmû‘u üç bin beş yüz guruş kıymetli yün memlû on aded minder ve on beş aded çatma yasdık ve otuz aded basma duvar yasdığı ve beş aded penbe memlû basma şilte ve yine penbe memlû beş aded mak‘ad ve yine penbe memlû beş aded erkân minderi ve on aded yün memlû basma diğer koltuk yasdığı ve üç aded müsta‘mel orta keçesi ve bir nühâs mangal ma‘a tabla ve beş aded nühâs sahan ma‘a kapak ve beş aded nühâs tencere ma‘a kapak ve bir nühâs tâbe ve bir nühâs güğüm ve bir nühâs leğen ma‘a ibrik ve bir nühâs sini ve üç aded su bardağı ve altı aded kâse ve on aded tabak ve on aded fincân ma‘a zarf ve üç aded cezve ve bir tepsi ve bir çukaya kaplı müsta‘mel nâfe boy kürkü ve bir Merinoza kaplı samur müsta‘mel boy kürkü, biri çuka ve birisi Merinoza kaplı müsta‘mel samur ve elma iki aded kısa kürk ve yine çukaya kaplı müsta‘mel nâfe kürkünü zevce-i müvekkile-i mezbûre Rukıye Hatun bi-gayrı hakkın fuzûlî müstakilleten ahz ü kabz edip el-yevm bi-a‘yânihâ yedinde mevcûde olmağla suâl olunup ve eşyâ-yı muharrere-i mezkûreden selâse-i erbâ‘ı hisse-i ırsiye-i şer‘iyyemi hâlâ bana redd ü teslîme zevce-i müvekkile-i mezbûre Rukıye Hatun’a izâfetle vekîl-i mezbûr İlyas Bey’e tenbîh olunmak bi’l-verâse matlûbumdur deyü da‘vâ etdikde vekîl-i mezbûr İlyas Bey dahi cevâbında eşyâ-yı muharrere-i merkūmeye müvekkilesi zevce-i mezbûrenin hâlâ bi-a‘yânihâ vaz‘-ı yedini ikrâr u i‘tirâf edip lâkin yedimde olup bin iki yüz yetmiş bir senesi şehr-i Rebî‘ülevveli’nin yirminci günü târîhiyle müverraha ve ol târîhde kasaba-i mezbûrede nâibü’ş-şer‘ bulunan mevâlî-i izâmdan fazîletlü es-Seyyid Mehmed Hâfız Nuri Efendi’nin imzâ ve hatemini hâviye işbu bir kıt‘a mübâya‘a hücceti nâtıka olduğu üzere müteveffâ-yı merkūm Hasan Efendi b. el-müteveffâ Silahdâr İsmail Ağa b. Abdullah hâl-i hayât ve kemâl-i akl ü sıhhatinde yedinde malı olan eşyâ-yı muharrere-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcesi müvekkilem mezbûre Rukıye Hatun’a üç bin beş yüz guruşa bey‘ ve temlîk ve teslîm eylediğinde ol dahi ber-vech-i muharrer iştirâ ve temellük ve kabz ü kabûl eylediğinden sonra semeni olan meblağ-ı mezkûr üç bin beş yüz guruşun mutâlebesine müte‘allıka da‘vâdan zevcesi müvekkilem mezbûre Rukıye Hatun’un zimmetini ibrâ-i sahîh-i şer‘î ile ibrâ ve iskāt eylediğinde ol dahi ibrâ-i mezkûrunu ba‘de’l-kabûl eşyâ-yı muharrere-i mezkûrede kendisinin aslâ ve kat‘â alâka ve medhali olmayıp zevcesi müvekkilem mezbûrenin mülk-i müşterâsı ve hakk-ı sırfı olmağla ol vechile müvekkilem zevce-i mezbûre Rukıye Hatun eşyâ-yı muharrere-i merkūmeye şirâen mâlı olduğuna binâen el-yevm bi-hakkın vaz‘-ı yed eder deyü hüccet-i mezkûreyi bi’l-ibrâz müdde‘î-i mezbûr Mehmed Sadık Ağa’nın inkârına mukārin bi’l-vekâle eylediği def‘ini ve mazmûn-ı hüccet-i mezkûreyi her biri lede’t-tezkiye adl ve makbûlü’ş-şehâde idükleri ihbâr olunan es-Seyyid Mehmed Abdülhalim Efendi b. Mehmed Arif ve es-Seyyid Mehmed Ragıb Efendi b. Osman nâm kimesneler şehâdetleriyle eşyâ-yı muharrere-i merkūmeyi mahâllinde lede’l-irâe ve’t-ta‘yîn bi’l-muvâcehe ber-nehc-i şer‘î isbât etmeğin mûcebince müdde‘î-i mezbûr Mehmed Sadık Ağa bi’l-verâse da‘vâ-i mezkûresiyle zevce-i müvekkile-i mezbûre Rukıye Hatun’a bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu]. Fî 15 Rebî‘ülâhir sene [1]274. el-Hâc İbrahim.