Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 167 Hüküm no: 143 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suada Hanım’ın çekmecesinden parasını alan kardeşi Ali Rıza Ağa’ya parayı ödemesi hususunda tenbihte bulunulması Kâtibine teslîm. İstanbul’da Atpazarı kurbünde Manisalı Mehmed Paşa mahâllesinde sâkine mu‘arrefetü’z-zât Şerîfe Suada Hanım bt. el-Hâc Ahmed mahfil-i şer‘iyyâtda li-ebeveyn er karındaşı Yorgancı esnâfından Ali Rıza Ağa b. el-mezbûr el-Hâc Ahmed muvâcehesinde benim mahâlle-i mezbûrede vâki‘ sâkine olduğum menzilimde bir ceviz çekmece derûnunda mevzû‘ malım olan bin yüz guruşumu karındaşım mezbûr Ali Rıza işbu târîh-i i‘lâmdan bir gün mukaddem fuzûlî ve bi-gayrı hakkın ahz ü kabz ve umûruna sarfla istihlâk etmekle ol vechile karındaşım mezbûr zimmetinde bi-tarîkı’d-damân alacak hakkım olan meblağ-ı mezkûr bin yüz guruşu hâlâ bana edâya karındaşım mezbûra tenbîh olunmak murâdımdır deyü ba‘de’d-da‘vâ ve’l-istintâk, ol dahi cevâbında kazıyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince meblağ-ı mezbûr bin yüz guruşun müdde‘iye-i mezbûre Şerîfe Suada Hanım’a edâ ve teslîme karındaşı mezbûr Ali Rıza Ağa ilzâm olunduğu huzûr-ı [âlîlerine i‘lâm olundu]. Fî-selhi Ra sene [12]73. Arif.