Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 166 Hüküm no: 142 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Ülfet Hanım’ın eşi Mahmud Efendi’den muhalaa usulüyle boşanması Mübâşiri hademe-i Âsafî’den İbrahim Ağa’ya teslîm. Mahrûse-i Galata’ya muzâfe kasaba-i Beşiktaş’da Avni Ömer Efendi mahâllesinde sâkine Âişe Ülfet Hanım bt. Asâkir-i hâssa-i şâhâne miralaylarından Hüseyin Hüsnü Bey b. Abdullah tarafından husûs-ı âti’l-beyanda vekîl olduğu zât-ı mûmâ-ileyhâyı bi’l-ma‘rifeti’ş-şer‘iyye ârifân asâkir-i hâssa-i şâhâne alay imamlarından Ali Şükrü Efendi b. Ahmed ve yüzbaşılarından İsmail Ağa b. Ahmed şehâdetleriyle bi’l-muvâcehe ber-nehc-i şer‘î sâbit ve sübût-ı vekâletine hükm-i şer‘î lâhık olan Hekimoğlu Ali Paşa Câmi‘-i şerîfi imam-ı sânîsi es-Seyyid Abdüllatif Efendi b. Hâfız Mehmed Emin bâb-ı âlîlerin takdîm olunan bir kıt‘a arzuhâl bâlâsına sâdır olan fermân-ı âlîlerine imtisâlen mahfil-i şer‘iyyâtda müvekkile-i mûmâ-ileyhânın zevc-i muhâlı‘ı Hazîne-i celîle-i Mâliye’de ketebeden Mahmud Efendi b. Ahmed muvâcehesinde mezbûre Mahmud Efendi müvekkilem mezbûre Âişe Ülfet Hanım’ın üç bin yedi yüz elli bir guruş mehr-i müeccel tesmiyesiyle zevc-i dâhili olup lâkin beynlerinde hüsn-i mu‘âşeretleri olmamağla zimmetinde mütekarrir ve ma‘kūdün-aleyh mehr-i müeccel-i merkūm üç bin yedi yüz elli bir guruş ile nafaka-i iddet-i mu‘ayyene-i ma‘lûmesi üzerlerine ve meûnet-i süknâsı dahi kendi üzerine olmak üzere zevci mezbûr Mahmud Efendi ile muhâla‘a-i sahîha-i şer‘iyye ile müvekkilem mûmâ-ileyhâ Âişe Ülfet Hanım’a izâfetle bi’l-vekâle hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetlerinden işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvîden ben müvekkilem mûmâ-ileyhâ Âişe Ülfet Hâaım’a izâfetle bi’l-vekâle mezbûr Mahmud Efendi’nin zimmetini, ol dahi vech-i muharrer üzere müvekkilem mûmâ-ileyhâ Âişe Ülfet Hanım’ın zimmetini tarafeynden her birimiz ibrâ-i âmm-ı sahîh-i şer‘î ile bi’l-asâle ve bi’l-vekâle kabûlümüzü hâvî ibrâ ve iskāt edip bu vechile külliyen kat‘-ı münâza‘a eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 11 C sene [12]73. el-Hâc İbrahim.