Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 57 Hüküm no: 1 Orijinal metin no: [iç kapak] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaldırılan Yeniçeri ve Cebeci ocakları ortaları adına olan vakıfların ortaya çıkarılması ve bu gibi vakıfların kiracıları tarafından mülkiyetlerine geçirilmemesi Mahmudpaşa Mahkemesi sicillâtına Evkāf-ı hümâyûn nâzırı sa‘âdetlü atûfetlü efendi hazretlerinin bir kıt‘a memhûr takrîri mefhûmunda mülgā yeniçeri ve cebeci ocakları ortalarının Dersaâdet’in dâhil ve hâric-i sûrunda vakfiyet sûretiyle bir takım vakıf müsakkafâtları olup bir kalemde mukayyed olmadığından gayrı perâkende olduğundan etrâfıyla tahkīk ve zâhire ihrâç olunarak zabt ve idâreleri lâzımeden ve husûs-ı mezkûrun lâyıkı ile tahkīk ve zâhire ihrâcına bakılmadığı sûretde eyâdî-i nâsda kalarak telef olacağı bedîhâtdan olduğuna binâen ol-bâbda arz olunan takrîr bâlâsına şeref-efzâ-yı sahîfe-i sudûr olan mübârek hatt-ı hümâyûn-ı şevket-makrûn-ı şâhâne ve sâdır olan fermân-ı âlî mûcebince o makūle musakkafâtın lâyıkı ile tahkīk ve zâhire ihrâcı için Evkāf-ı hümâyûn-ı şâhâne tarafından bir münâsib kimesne bi’l-intihâb memûr ve ta‘yîn kılınarak her biri mahallerinde mu‘âyene ve tahkīk-i mâdde olunarak ardı alındıkda usûl-i vakfa tatbîkan mikdâr-ı kemiyet ve keyfiyetlerini mübeyyin defteri arz ve takdîm kılınmak üzere kendüye havâle buyurulmuş olduğuna binâen muktezâ-yı irâde-i seniyye mûcebince musakkafât-ı mezkûrenin sırran ve alenen îcâbına göre etrâfıyla mahallerinden ve lâzım gelenlerden lâyıkı ile bi’t-taharrî tecessüs ve tahkīk ve zâhire ihrâc ile herbiri başka başka mahallerinde bi’l-mu‘âyene tahkīk-i mâdde olunarak müceddeden sebt-i cerîde-i hüccet? olunması husûsu tarafından bi’l-vekâle umûr-ı evkāf-ı hümâyûnda müstahdem Seyyid Mehmed Ragıb Efendi’ye ihâle kılınarak tahkīklerine şürû‘ ve mübâşeret ettirilmiş ise de o makūle musakkafât mutasarrıf ve müstecirleri ba‘zı esbâba mebnî yedlerinde olan senedâtı ihfâ ve ilgā ederek mülkiyete tahvîl dâ‘iyesiyle ba‘zı mehâkim taraflarından hüccet mutâlebe ve ahzı vesâilinin istihsâline teşebbüs birle hıyel ve hüd‘aya sülûk edecekleri mülâhazadan gayr-ı ba‘îd olduğuna binâen mehâkim taraflarından o makūle hüccet-i şer‘iye taleb ve istid‘â vukū‘unda bir vechile tecvîz ve havâle-i sem‘-i i‘tibâr olunmayıp tahkīk-i mâdde zımnında evvel emirde Nezâret-i Evkāf-ı hümâyûn tarafına gönderilmek üzere muhallefâta kayd ile mehâkim taraflarına başka başka birer kıt‘a ilmühaberinin i‘tâsıyla turuk-ı hîlenin senedi îcâb-ı maslahatdan idüğünü tahrîr ve inhâ eylediği ecilden mûcebince muhallefâta kayd ile lâzım gelen mahallere ilmühaberleri verilmek fermân buyurulmağın mûcebiyle kayd olunup mehâkim-i sâire sicillâtına başka başka ilmühaberleri verilmekle keyfiyet ma‘lûm olmak için Mahmudpaşa Mahkemesi sicillâtı tarafına dahi işbu ilmühaber verildi. Fî-gurre-i Receb sene 1242 (mühür) Es-Seyyid Mehmed