Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 83 Hüküm no: 37 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Hüseyin Kapudan’ın Hafız Ömer Tahir ve Terzi Hacı Mustafa Ağa’dan aldığı borç karşılığında kahveci gediğini rehin vermesi İdâne hücceti Mahmiye-i İstanbul’da Esirpazarı’nda sâkin Morgurlulu? Kahveci Hüseyin Kapudan b. Mustafa meclis-i şer‘-i şerîf-i enverde Rizeli işbu bâ‘iseyü’l-vesîka Hafız Ömer Tâhir Efendi b. Mehmed Emin ve Terzi el-Hâc Mustafa Ağa b. el-Hâc Osman mahzarında ikrâr-ı tam ve takrîr-i kelâm edip merkūmân Hafız Ömer Tâhir Efendi ve el-Hâc Mustafa Ağa mallarından beş bin guruş bana idâne ve teslîm ben dahi istidâne ve kabz edip ve semeni târih-i kitâbdan bir sene tamamına değin müeccel ve mev‘ûd olmak üzere yine merkūmânın mallarından ve yedlerinden iştirâ ve kabz eylediğim bir cild Dürer kitâbı semeninden altı yüz guruş ki ciheteyn-i mezkûreteynden cem‘an beş bin altı yüz guruş zimmetimde merkūmân Hafız Ömer Tâhir Efendi ve el-Hâc Mustafa Ağa’ya borcum ve deynim olup ben deynim olan meblağ-ı mecmû‘-ı mezbûr beş bin altı yüz guruş mukābelesinde mahmiye-i mezbûrede Esirpazarı içinde mescid tahtında vâki‘ karşısında kameriye ve bir mikdâr bahçeyi müştemil bir bâb kahve dükkânı derûnunda mevcûde beyne’l-esnâf gedik ta‘bîr olunur bâ-hüccet-i şer‘iye yedimde emvâlim olan kırk beş kehrübâ imâmeli duhân çubuğu ve on sim zarf ma‘a fincan ve üç kahve güğüm ve bir kahve kutusu ve bir mangal ve bir mir’at ve bir çekmece ve yedi cezbe ve sâir âlât-ı lâzıme-i ma‘lûmemi rehîn vaz‘ ü teslîm eylediğimde onlar dahi ber-vech-i muharrer irtihân ve kabz ü kabûl eylediklerinden sonra yine merkūmân Hafız Ömer Tâhir Efendi ve el-Hâc Mustafa Ağa âlât-ı muharrere-i mezkûreyi li-ecli’l-isti‘mâl bana i‘âre ve teslîm, ben dahi yedlerinden isti‘âre ve kabz edip âlât-ı mezkûre hâlâ yedimde âriyettir dedikde, gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 13 Rebî‘ülâhir sene 1241 Şühûdü’l-hâl: Maraşîzâde Memiş Ağa, Gül Ahmed Ağa, İmâmoğlu el-Hâc Mehmed, Zenginoğlu Süleyman, Emir Ömer Ağa, Muhzır Ali Çelebi [5a-21a Boş]