Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 83 Hüküm no: 36 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ali’nin Ali Ağa’dan borç para alması ve karşılığında hoşafcı ve kebabcı gediğini rehin vermesi İdâne, rehin, 1560 guruş Mahmiye-i İstanbul’da Şehzâde Câmi‘-i şerîfi kurbünde sâkin Mustafa b. Ali meclis-i şer‘-i şerîf-i enverde işbu bâ‘isü’l-vesîka Ali Ağa b. Ömer mahzarında ikrâr ve takrîr-i kelâm edip merkūm Ali Ağa bana malından bin iki yüz guruş idâne ve teslîm ben dahi yedinden istidâne ve kabz etmemle meblağ-ı mezbûr bin iki yüz guruş ile semeni târih-i kitâbdan iki sene tamamına değin müeccel ve mev‘ûd olmak üzere yine merkūm Ali Ağa’nın malından ve yedinden iştirâ ve kabz eylediğim bir hilâlî sâ‘at semeninden üç yüz altmış guruş ki ciheteyn-i mezkûreteynden cem‘an bin beş yüz altmış guruş zimmetimde mezbûr Ali Ağa’ya vâcibü’l-edâ ve lâzımü’l-kazâ sahîhan deynim olmağla ben deynim olan meblağ-ı mecmû‘-ı mezbûr mukābelesinde mahmiye-i mezbûrede Hasan Paşa Hanı kurbünde vâki‘ kasab ve kahveci dükkânları beynlerinde kâin hoşâbcı ve kebâbcı bir bâb dükkân derûnunda mevcûde beyne’l-esnâf gedik ta‘bîr olunur müstakıllen yedimde emvâlim olan bâ-defter-i müfredât âlât-ı lâzıme-i ma‘lûmemi rehin vaz‘ ü teslîm eylediğimde ol dahi ber-vech-i muharrer irtihân ve kabz ü kabûl eyledikden sonra merkūm Ali Ağa âlât-ı muharrere-i mezkûreyi li-ecli’l-isti‘mâl bana i‘âre ve teslîm ben dahi yedinden isti‘âre ve kabz etmemle âlât-ı muharrere-i mezkûre hâlen yedimde âriyettir dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 23 Zilka‘de sene 1240 Şühûdü’l-hâl: Kethudâ Hüseyin Ağa, Yiğitbaşı Ali Ağa, Mütevelli Ali Ağa, Hüseyin Usta, Halil Usta, Muhzır Ali Çelebi.