Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 86 Hüküm no: 41 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize Hatun’un Mahmud Efendi’yi vekil tayin etmesi Vekâlet hücceti Vilâyet-i Anadolu’da Amasya kazâsında sâkin iken bundan akdem fevt olan Nazife bt. Abdullah b. Mustafa’nın verâseti zevc-i metrûku Samson Mehmed ile li-ebeveyn kız karındaşı Hafize ve li-ebeveyn er karındaşı İsmail’e inhisârı tahakkukundan sonra zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûre Hafize Hatun meclis-i şer‘-i şerîf-i enverde işbu bâ‘isü’l-vesîka Mahmud Efendi b. Mehmed muvâcehesinde bi’l-verâse ikrâr-ı tam ve takrîr-i kelâm edip kazâ-i mezbûrede vâki‘ ma‘lûmü’l-hudûd bir bâb mülk menzil ve derûnunda mevcûde bâ-defter-i müfredât eşyâ-yı ma‘lûme müstakıllen ve ma‘lûmü’l-hudûd bir kıt‘a kürûmu mülk bağın nısfı müteveffât-ı mezbûrenin ve nısf-ı âharı âharın yedlerinde mülkleri olmağla menzil ve eşyâ-yı ma‘lûme ve nısf bağdan hisse-i ma‘lûmemi vâzı‘atü’l-yed olanlardan mahâllinde taleb ve da‘vâ ve ahz ü kabz ve hıfza ve husûs-ı mezkûr mütevakkıf olduğu umûrun küllîsine tarafımdan merkūm Mahmud Efendi’yi vekîl ve nâib-i menâb nasb ü ta‘yîn eyledim dedikde ol dahi ber-vech-i muharrer vekâlet-i merkūmeyi kabûl ve merâsimini kemâ-yenbagī mahâllinde edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 8 S sene [1]242 Şühûdü’l-hâl: Derviş Ahmed b. Abdullah, Osman b. el-Hâc Ahmed