Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 86 Hüküm no: 42 Orijinal metin no: [21b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arhondi bt. Kortis’in Tekfurdağı’ndaki arsasını Yorgaki v. Nikola’ya satması Tekfurdağı’nda mübâya‘a Tekfurdağı nâm-ı diğer Rodoscuk kasabasında Papa İstefan mahallesi ahâlisinden olup mahmiye-i İstanbul’da Samatya kurbünde mütemekkin Arhondi bt. Kortis v. Adam Nasrâniyenin zevci ve tarafından husûs-ı âti’l-beyânda vekîl olduğu şahsı bilir İsterati v. Togodoş ve Yanaki v. Dimitri zimmîler şehâdetleriyle sâbit olan Manol v. Dimitri zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Yorgaki v. Nikola zimmî muvâcehesinde bi’l-vekâle ikrâr-ı tam ve takrîr-i kelâm edip akd-i âti’z-zikrin sudûruna değin müvekkilem zevce-i mersûme Arhondi Nasrâniyenin müstakılleten yedinde mülk ve hakkı olup kasaba-i mezbûrede zikr olunan Papa İstefan mahallesinde vâki‘ bir tarafdan Bayram oğlu bahçesi ve bir tarafdan Anderya zimmî menzili ve iki tarafdan tarîk-i âm ile mahdûd bir bâb mülk menzil arsası tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mersûm Yorgaki zimmîye iki yüz kırk guruşa bi’l-vekâle bey‘ ü temlik ve mahâllinde zabta bi’l-vekâle taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semen olan meblağ-ı mezbûr iki yüz kırk guruşu müşteri-yi mersûm bana def‘ ü teslîm ben dahi yedinden bi’l-vekâle tamamen ahz ü kabz eyledim fîmâ-ba‘d zikr olunan arsa-i mahdûde mersûm Yorgaki zimmînin mülk-i müşterâsı ve hakk-ı sırfı olup müvekkilem zevcem mersûmenin kat‘a alâka ve medhali kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-vech-i muharrer âharın ibrâsını bi’l-asâle ve bi’l-vekâle kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 10 S sene [1]242 Şühûdü’l-hâl: Muhzır Genç Mehmed Çelebi, Muhzır Ali Çelebi, Muhzır Feyzullah Çelebi Tütüncü Kiryako, Kuyumcu Yanako