Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 92 Hüküm no: 50 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Bağdisar’ın Sahak v. Agob’u vekil tayin etmesi Ahz [ü] kabz vekâlet-i devriye ile ibrâ Hasköy’de Abdüsselam mahallesinde mütemekkin Artin v. Bağdisar zimmî meclis-i şer‘-i hatîr-i lâzımü’t-tevkīrde kız karındaşı işbu hâmiletü’r-rakīm Bitter bt. Bağdisar Nasrâniye tarafından husûs-ı âti’l-beyânda vekîl olduğu şahsı bilir Kigork v. Agob ve Karabet v. Avanes zimmîler şehâdetleriyle sâbit olan Sahak v. Agob zimmî muvâcehesinde ikrâr-ı tam ve takrîr-i kelâm edip işbu bir kıt‘a i‘lâm-ı şer‘î nâtıka olduğu üzere hâlâ Anadolu kādıaskeri fazîletlü Mehmed Tâhir Efendi’nin zimmetinde edâsı lâzım olan elli bin guruş deyni olup lâkin meblağ-ı mezbûrun ancak yirmi altı bin yedi yüz on guruşu benim ve mâ‘adâ beş bin sekiz yüz kırk dört guruşu gāib ani’l-meclis İstefan zimmînin ve bâkī on yedi bin dört yüz kırk altı guruşu müvekkile-i mersûme Bitter Nasrâniyenin olmağla ben alacağım olan yirmi altı bin yedi yüz on guruşun yirmi üç bin sekiz yüz on guruşunu ve gāib-i mersûm İstefan zimmî alacağı olan beş bin sekiz yüz kırk dört guruşun beş bin beş yüz guruşunu kabz etmemizle gāib-i mersûm İstefan zimmî alacağı olan meblağ-ı bâkī-i mezbûru Efendi-yi mûmâ-ileyhden kabzına tarafeynden müvekkile-i mersûmeyi bundan akdem tevkîl etmekle ben dahi zikri âtî kabza tevkîl edeceğim iki bin dokuz yüz guruşu kız karındaşım müvekkile-i mersûme Bitter Nasrâniye kendi malından ber-vech-i peşîn bana def‘ ü teslîm ben dahi yedinden tamamen ahz ü kabz edip meblağ-ı mezbûrdan müvekkile-i mersûme alacağı olan on yedi bin dört yüz kırk dört guruş ile benim hissemden bâkī kalan iki bin dokuz yüz guruşu dahi ber-vech-i peşîn bana medfû‘una takasan efendi-yi müşârün-ileyhden taleb ve da‘vâ ve ahz ü kabza ve makbûzundan benim alacağım olan iki bin dokuz yüz guruşu ber-vech-i peşîn bana medfû‘una takas ve mahsûba ve husûs-ı mezkûr mütevakkıf olduğu umûrun küllîsine tarafımdan küllemâ azeltüke fe ente vekîlî mefhûmu üzere vekâlet-i devriye ile müvekkile-i mersûme Bitter Nasrâniyeyi vekîl nasb ü ta‘yîn eylediğimde ol dahi vekâlet-i mezbûreyi kabûl edip ben husûs-ı mezkûra ve sâire müte‘allika da‘vâdan ben kız karındaşım mersûme ile vekîl-i mersûmun zimmetini ol dahi bi’l-asâle ve bi’l-vekâle benim zimmetimi her birimiz ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 12 S sene [1]242 Şühûdü’l-hâl: Muhzır Ebûbekir Çelebi, Muhzır Emin Çelebi, Muhzır Ali Çelebi, Muhzır İsmail, Muhzır Genç Mehmed Çelebi.