Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 91 Hüküm no: 49 Orijinal metin no: [22a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İbrahim Asri ve kardeşi Veliyüddin’in berber gediğini Mikail v. Agaham’a satmaları Mahmiye-i İstanbul’da Tavşantaşı kurbünde Sarrâc İshak mahallesinde sâkinler el-Hâc İbrahim Efendi ve karındaşı Veliyüddin ibney el-Hâc Habib meclis-i şer‘-i şerîf-i enverde işbu hâmilü’r-rakīm Mikâil v. Agaham zimmî muvâcehesinde her biri ikrâr-ı tam ve takrîr-i kelâm edip merkūm el-Hâc İbrahim Efendi mahmiye-i mezbûrede Vezir Han’ı kurbünde tütüncü ve berber gedikleri beynlerinde kâin Başmuhâsebe kaleminde Osman ismine mukayyed şehriye üçer guruş icâreli bir bâb berber dükkânı ve derûnunda mevcûde beyne’l-esnâf gedik ta‘bîr olunur on ustura ve bir kazgan ve iki leğen ve bir tas ve bir tepsi ve bir kayış ve bir ayna ve bir mikrâs ve sâir âlât-ı lâzıme-i ma‘lûmenin nısfları benim ve nısf-ı âharları karındaşım merkūm Veliyüddin’in yedimizde iştirâken ve şâyi‘an emvâlimiz olmağla biz âlât-ı lâzıme-i muharrere-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Mikâil zimmîye iki bin sekiz yüz elli guruşa bey‘ ü temlik ve teslîm <> eylediğimizde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki bin sekiz yüz elli guruşu müşteri-yi mersûm bize def‘ ü teslîm biz dahi yedinden tamamen ahz ü kabz ve beynimizde iktisâm eyledik fîmâ-ba‘d âlât-ı lâzıme-i muharrere-i mezkûre mersûm Mikâil zimmînin emvâl-i müşterâsı ve hakk-ı sırfı olup bizim aslâ ve kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 9 S sene [1]242 Şühûdü’l-hâl: Kethudâ İbrahim Ağa, Şeyh el-Hâc Mustafa Efendi, Du‘âcı İsmail Efendi, Yiğitbaşı es-Seyyid Nurullah Ağa, Çavuş Mustafa Efendi, Muhzır Ali Çelebi