Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 94 Hüküm no: 54 Orijinal metin no: [22b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın saka gediği hissesini Emine bt. Mehmed’e satması Saka gediği mübâya‘ası Mahmiye-i İstanbul’da Yahyagül mahallesinde sâkin Hüseyin Ağa b. Osman meclis-i şer‘-i şerîf-i enverde zâtı mu‘arrefe işbu bâ‘isetü’l-vesîka Emine bt. Mehmed mahzarında ikrâr-ı tam ve takrîr-i kelâm edip mahmiye-i mezbûrede Ayasofya-i kebîr çeşmesine merbût sakalar beynlerinde gedik ta‘bîr olunur bir res bârgir ve bir semer ve sâir âlât dört sehm i‘tibârıyla bir sehmi benim ve üç sehmi mezbûre Emine Hatun’un irsen yedimizde mülkümüz olmağla ben âlât-ı mezkûrede ber-vech-i muharrer mâlik olduğum bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müşterekim mezbûre Emine Hatun’a üç yüz guruşa bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç yüz guruşu müşteriye-i mezbûre bana def‘ ü teslîm, ben dahi yedinden tamamen ahz ü kabz eyledim. Fîmâ-ba‘d âlât-ı muharrere-i mezkûrenin mecmû‘u mezbûre Emine Hatun’un emvâl-i müşterâsı ve hakk-ı sırfı olup benim kat‘a alâka ve medhalim kalmamışdır dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 21 S sene [1]242 Şühûdü’l-hâl: Muhzır Ali Çelebi, Muhzır Emin Çelebi