Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 95 Hüküm no: 55 Orijinal metin no: [22b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Minas v. Kasbar’ın miras hissesini Askohi bt. Seher’den teslim alması İktisâm hücceti Vilâyet-i Anadolu’da Erzurum kazâsı re‘âyâsından olup mahmiye-i İstanbul’da Samatya kurbünde mütemekkin iken bundan akdem hâlik olan David v. Fidan zimmînin verâseti zevce-i metrûkesi Askohi bt. Seher Nasrâniye ile ammisi oğlu Minas v. Kasbar zimmîye inhisârı tahakkukundan sonra ammisi oğlu mersûm Minas zimmî meclis-i şer‘-i hatîr-i lâzımü’t-tevkīrde zevce-i mersûme işbu hâmilü’r-rakīm Askohi Nasrâniye tarafından husûs-ı âtîde tasdîka vekîl-i şer‘îsi Agob v. Kigork zimmî muvâcehesinde bi’l-verâse ikrâr-ı tam ve takrîr-i kelâm edip mûrisimiz hâlik-i mersûmun bi’l-cümle nakid ve terekesini zevce-i mersûme Askohi Nasrâniye bi’l-verâse ve bi’l-emâne kabz ve vaz‘-ı yed etmekle biz tereke-i hâlik-i mersûmu beynimizde bi’t-terâzî iktisâm ve her birimiz hisse-i irsiyemizi âhar yedinden tamamen ahz ü kabz edip hâlik-i mersûmun kalîl ü kesîr bi’l-cümle ism-i mâl ıtlâk olunur terekesine ve hukūk-ı mîrâsa müte‘allika da‘vâdan mersûm Askohi Nasrâniyenin zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 22 S sene [1]242 Şühûdü’l-hâl: Muhzır Ali Çelebi, Tönbekici Yusuf, Muhzır Ebûbekir Çelebi, Asvador, Şalcı Serkiz