Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 101 Hüküm no: 65 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in yanında bulunan küçük oğlu Mehmed için nafaka takdir olunması Sagīr Nafakası, 15 guruş Mahmiye-i İstanbul’da Aksaray kurbünde Koğacıdede mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Âişe bt. Mehmed nâm hatun meclis-i şer‘-i şerîf-i enverde zevc-i sâbıkı Ahmed b. Ali mahzarında ikrâr-ı tam ve takrîr-i kelâm edip merkūm Ahmed ile zevciyet beynimizde kāime iken merkūmun firâşından hâsıl ve benden mütevellid ve bi-hakkı’l-hıdâne hacr ve terbiyemde olan tahmînen iki buçuk yaşında Mehmed nâm sagīrin malı olmayıp ol-vechile nafakaya muhtâc olmağla oğlu sagīr-i merkūmun nafaka ve kisve-bahâsı için babası merkūm üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisve-bahâsı için babası merkūm üzerine bi’t-terâzî târih-i kitâbdan beher şehr on beşer guruş farz ve takdîr buyurup meblağ-ı mefrûz-ı mezkûru sagīr-i merkūmun nafaka ve kisvesine ve levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Âişe Hatun’a izin vermeğin mâ-vaka‘a bi’t-taleb ketb olundu. Fî 3 Ra sene [1]242 Şühûdü’l-hâl: Muhzır İsmail Çelebi, Muhzır Abdulfettah Çelebi, Muhzır Mehmed Çelebi, Muhzır Ali Çelebi