Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 101 Hüküm no: 64 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın yanmış olan evini yeniden yaparken Sabatay’ın mağazası üzerine inşa etmemeyi taahhüt etmesi Ta‘ahhüd hücceti Mahmiye-i İstanbul’da Mahmudpaşa Mahallesinde sâkin Mustafa Ağa b. Ali meclis-i şer‘-i hatîr-i lâzımü’t-tevkīrde Mahmud Paşa Çarşısı’nda Çeşme sırasında beşinci iki pencere ve bir kapılı mağazanın mutasarrıfı Sabatay v. Kanbur Todori muvâcehesinde ikrâr-ı tam ve takrîr-i kelâm edip mersûm Sabatay Yahûdî’nin sâlifü’l-beyân mağazası benim menzilimin ba‘zı mahâlli tahtında olup bundan akdem menzil-i mezkûr muhterik olup ben bu esnâda menzil-i mezkûru kadîmi üzere binâya şürû‘ etmemle mersûm Sabatay Yahûdî mağaza üzerine binâ etmemem için malından bin beş yüz guruş def‘ ü teslîm ben dahi yedinden ahz ü kabz ve umûruma sarfla istihlâk etmemle ben mersûm Sabatay Yahûdî’nin mağazası üzerine aslâ binâ etmeyip ve zikr olunan mağazanın duvarı hizâsına gasilhâne ve âbdesthâne binâ eder isem dahi çirkâblarını binâ eyleyeceğim menzilin hâkına cereyân ettirmek üzere ta‘ahhüd-i tam ve akd-i mîsâk eyledim dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 25 S sene [1]242 Şühûdü’l-hâl: Muhzır Mehmed Çelebi, Muhzır Ali Çelebi, Muhzır Emin Çelebi