Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 103 Hüküm no: 68 Orijinal metin no: [23b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İsmail Efendi’nin evindeki bazı eşyaları eşi Fatıma bt. Hacı Abdurrahman’a satması Husûs ile eşyâ mübâya‘a hibe ve nefy-i mülk, 300 guruş. Husûs-ı âti’l-beyânın mahâllinde ketb ü takrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi mahmiye-i İstanbul’da Kabasakal mahallesinde vâki‘ el-Hâc İsmail Efendi b. Osman’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i Nebevî ettikde merkūm el-Hâc İsmail Efendi meclis-i ma‘kūd-ı mezkûrda zevcesi işbu bâ‘isetü’l-vesîka Fatıma bt. el-Hâc Abdurrahman’ın sadrî oğlu ve tarafından husûs-ı âtîde tasdîka vekîl-i şer‘îsi es-Seyyid Mehmed Eşref Efendi b. İbrahim mahzarında ikrâr-ı tam ve takrîr-i kelâm edip kendi malım olup menzil-i mezkûrda mevcûde eşyâ-yı memlûkemden bir köhne vaşak kürk ve bir köhne cübbe semmûr kürk ve bir köhne paça kürk ve bir köhne beyaz şal ve bir müsta‘mel çuka biniş ve bir müsta‘mel şalî cübbe ve bir şalî biniş ve bir kılıç ve bir çuka çakşır ve üç köhne destâr ve bir şalî çakşır ve bir Acem şalı ve bir kavuk ve dört gömlek ve dört don ve üç köhne entarimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcem mezbûre Fatıma Hatun’a üç yüz guruşa bey‘ ü temlik ve yine malım olan bir sîm devât ve bir sîm koyun sâ‘ati ve bir mushaf-ı şerîfimi zevcem mezbûreye hibe-i sahîha-i şer‘iye ile hibe ve temlik ve teslîm eylediğimde ol dahi ber-vech-i muharrer iştirâ ve meclis-i hibede ittihâb ve temellük ve tesellüm ve kabz ü kabûl eyledikden sonra semeni olan meblağ-ı mezbûr üç yüz guruş mutâlebesine ve hukūk-ı sâire-i şer‘iyeye müte‘allika da‘vâdan zevcem mezbûre Fatıma Hatun’un zimmetini ibrâ ve iskāt eylediğimde ol dahi <> ibrâ-yı mezkûrumu kabûl edip fîmâ-ba‘d eşyâ-yı [24a] muharrere-i mezkûre mezbûre Fatıma Hatun’un emvâl-i müşterâsı ve hakk-ı sırfı ve sâlifü’l-beyân devât ve sâ‘at ve mushaf-ı şerîf dahi mâl-ı mevhûbesi olup benim kat‘a alâka ve medhalim kalmadığından mâ‘adâ menzil-i mezkûrda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u zevcem mezbûre Fatıma Hatun’un kendi malı olup benim üzerime lâbis olduğum köhne libâsımdan gayrı ism-i mâl ıtlâk olunur bir nesnem yokdur dedikde vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 3 Ra sene [1]242 Şühûdü’l-hâl: Muhzır Mehmed Çelebi, Halil Efendi b. Ahmed, Abdüsselam Efendi b. Musa, Çukadâr Mustafa Ağa, Halil b. Mehmed, Mehmed b. Mustafa, Muhzır Ali Çelebi.