Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 128 Hüküm no: 104 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rabia’nın vasiyeti ve eşi Hacı Yusuf Ağa’yı vasi tayin etmesi Vasiyet Mahmiye-i İstanbul’da Atik Ali Paşa kurbünde Akşemseddin mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Rabia bt. Osman nâm hatun meclis-i şer‘-i şerîf-i enverde zevci ve zikri âtî vesâyâsını tenfîze vasîyy-i muhtâr nasb ü ihtiyâr eylediği bâ‘isü’l-vesîka el-Hâc Yusuf Ağa b. İbrahim mahzarında ikrâr-ı tam ve takrîr-i kelâm edip ben bi-emrillâhi te‘âlâ vefât eylediğimde cemî‘ terekemi ve zimem-i nâsda zuhûr eden hukūkumu zevcim merkūm ahz ü kabz edip düyûn-ı müsbetem zuhûr eder ise ba‘de’l-edâ bâkī kalan terekemin sülüsünü ifrâz ve sülüs-i mezkûrdan altmış guruş iskāt-ı salât ve kefâret-i savm ve yemînim ve nüzûrâtım için devir ve fukarâ-yı Müslimîne tasadduk oluna ve sülüs-i mezkûrdan yüz guruşa bir cild mushaf-ı şerîf iştirâ olunup müstahıkkīnden bir kimesneye verile ve sülüs-i mezkûrdan fazla kalır ise fazla-i mezkûr vasîm mezbûr yediyle vücûh-ı birr ü hayrâta harc ü sarf eyleye ve bâkī kalan sülüsân terekemi benim vâris ve vârisem olmamağla mûsayyün-leh bimâ zâde ale’s-sülüs tarîki üzere kendi nefsi için ahz ü kabz eyleye deyü vasiyet ve tenfîzine zevcim merkūm el-Hâc Yusuf Ağa vasîyy-i muhtâr nasb ü ta‘yîn eyledim dedikde, ol dahi ber-vech-i muharrer vesâyet-i merkūmeyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 16 Ra sene [1]242 Şühûdü’l-hâl: Muhzır Ali Çelebi, Mustafa Ağa, Hafız Mustafa Efendi, Devâtçı Ahmed Efendi, Nalband Hüseyin, Yazıcı el-Hâc Ahmed Efendi, Muhzır Mehmed Çelebi.