Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 127 Hüküm no: 103 Orijinal metin no: [27a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın, vefat eden kocası Mehmed Esad Efendi’den intikal eden ve Sarraf Davidoğlu Andon’da kalan alacağını tahsil etmesi 12000 guruş ahz, kabz, ibrâ Enderûn-ı hümâyûn çerâğānından Laleli Evkāfı kâtibi olup mahmiye-i İstanbul’da Mesih Ali Paşa-yı atik mahallesinde sâkin iken bundan akdem vefât eden Mehmed Esad Efendi b. Abdullah’ın zevce-i menkûha-i metrûkesi zâtı mu‘arrefe Emine bt. Abdullah nâm hatun musâhib-i hazret-i şehriyârî Cüce el-Hâc Mehmed Emin Ağa b. Ali hâzır olduğu hâlde meclis-i şer‘-i şerîf-i enverde sarrâf tâifesinden işbu hâmilü’r-rakīm Davidoğlu Andon v. Karabet zimmî tarafından husûs-ı âti’l-beyânda tasdîka vekîl-i şer‘îsi Recai Hasan Efendi b. el-Hâc Mustafa mahzarında bi’l-verâse ikrâr-ı tam ve takrîr-i kelâm edip mûrisim zevcim müteveffâ-yı mezbûrun mersûm Andon zimmî zimmetinde hayatında cihet-i deyn-i şer‘îden on iki bin guruş alacak hakkı olup kable’l-ahz ve’l-istifâ fevt ve meblağ-ı mezbûr benimle beytü’l-mâle mevrûs oldukdan sonra tereke-i müteveffâ-yı mezbûrun selâse-i erba‘ı dahi taraf-ı saltanat-ı seniyyeden bana in‘âm ve ihsân olmağla meblağ-ı mezbûr on iki bin guruşu mersûm Andon zimmî bana def‘ ü teslîm ben dahi yedinden tamamen ahz ü kabz edip husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan mersûm Andon zimmînin zimmetini ibrâ ve iskāt eylediğimde ol dahi ber-vech-i muharrer [27b] ibrâ-yı mezkûrumu kabûl eyledi dedikde gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Şühûdü’l-hâl: Halil Efendi b. Süleyman, Halil b. Halil, Muhzır Mehmed Çelebi, Muhzır Ali Çelebi.