Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 129 Hüküm no: 106 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Ömer’in annesi Ayşe ile beraber, boşandığı eşi Osman İzzet Efendi’nin zimmetini ibra ettikleri Husûs ile tekâlif ahz, kabz ibrâ, 1700 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana es-Seyyid Numan Efendi mahmiye-i İstanbul’da Çakır Ağa mahallesinde vâki‘ Osman İzzet Efendi b. el-Hâc Ali’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i <<âlî ettikde>> Nebevî ettikde mezbûr Osman İzzet Efendi’nin zevce-i mutallakası olup zâtı Müslimûn-ı merkūmûn ta‘rîfleriyle mu‘arrefe olan Şerife Hadice bt. Ömer nâm hatun [ve] vâlidesi kezâlik zâtı mu‘arrefe Şerife Âişe bt. Mustafa hâzıra olduğu hâlde meclis-i ma‘kūd-ı mezkûrda işbu bâ‘isü’l-vesîka merkūm Osman İzzet Efendi mahzarında ikrâr-ı tam ve takrîr-i kelâm edip mezbûr Osman İzzet Efendi zevc-i dâhilim olup târih-i vesîkadan üç gün mukaddem beni tatlîk etmekle zimmetinde mütekarrir ve ma‘kūdün-aleyh olan beş yüz guruş mehr-i müeccelim ve nafaka-i iddetim ve meûnet-i süknâm mukābelelerinde beynimizde bi’t-terâzî ta‘yîn olunan iki yüz guruş ve zevciyet beynimizde kāime iken malımdan âhara bey‘ için bi’l-emâne kabz ve âhara bey‘ ve semenini kendi umûruna sarfla istihlâk eylediği bir çift elmaslı zümrüd küpe ve bir ayaklı elmas çiçek ve bir elmas iğne ve bir ay yıldız resminde çiçek ve bir küpenin kıymetleri olan bin guruş ve bi-şarti’r-rücû‘ emriyle vâlidem hâzıra-i mezbûrenin kezâlik işbu hâzıratü bi’l-meclis Nefise bt. Abdullah’dan istidâne ve umûr-ı ma‘lûmesine masrûfu olan üç yüz guruş ki cem‘an iki bin guruşun ben damânen alacağım olan meblağın ve vâlidem hâzıra-i mezbûre alacağı olan meblağın üç yüz guruşunu rızâmla hat ve tenzîl etmemizle bâkīsi olan bin yedi yüz guruşu zevcim mezbûr işbu meclis-i şer‘de bize def‘ ü teslîm biz dahi yedinden tamamen ahz ü kabz eyledik, min-ba‘d meblağ-ı mezbûrdan zevcim merkūm Osman İzzet Efendi yed ve zimmetinde bir akçe ve bir habbe bâkī kalmamağla ben vâlidem hâzıra-i mezbûre Şerife Âişe Hatun hukūk-ı zevciyete ve ibtidâ-yı zevciyetden işbu târih-i vesîkaya gelince sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan zevcim mezbûr Osman İzzet Efendi’nin zimmetini ol dahi kezâlik benim ve vâlidem hâzıra-i mezbûrenin zimmetlerimizi her birimiz ibrâ ve iskāt ve her biri ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 17 Ra sene [1]242 Şühûdü’l-hâl: Eşrâf-ı kuzâtdan Mehmed Sadık Efendi, İmâm-ı mahalle Mahmud Efendi, Süleyman Efendi b. İbrahim, İsmail Ağa b. Ahmed, İbrahim Efendi, Çukadâr Mustafa Ağa, Muhzır Mehmed Çelebi