Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 130 Hüküm no: 107 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mehmed’in bazı ev eşyalarını torunu Seyyid Mehmed Ali’ye satması Eşyâ mübâya‘ası, nefy-i mülk, 250 guruş Mahmiye-i İstanbul’da Gedikpaşa kurbünde Dîvânî Ali mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Fatıma bt. Mehmed nâm hatun meclis-i şer‘-i şerîf-i enverde kızının oğlu işbu bâ‘isü’l-vesîka es-Seyyid Mehmed Ali b. Osman mahzarında ikrâr-ı tam ve takrîr-i kelâm edip eşyâ-yı memlûkemden dört minder ve sekiz yasdık ve üç köhne mak‘ad ve üç yorgan ve iki döşek ve bir şilte ve yedi sahan ve üç tencere ma‘a kapak ve bir lenger ve üç kadayıf tepsisi ve bir sagīr sini ve bir nühâs mangal ve bir kabza semmûr kürk ve bir nâfe kürk ve üç entari ve bir hilâlî sâ‘atimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile oğlum mezbûr es-Seyyid Mehmed Ali’ye iki yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikdensonra semeni olan meblağ-ı mezbûr iki yüz elli guruş mutâlebesine müte‘allika da‘vâdan oğlum mezbûr es-Seyyid Mehmed Ali’nin zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi. Fîmâ-ba‘d eşyâ-yı muharrere-i mezkûre oğlum mezbûr es-Seyyid Ali’nin emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ mahalle-i mezbûrede vâki‘ oğlum mezbûr ile ma‘an sâkine olduğumuz menzil derûnunda mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiye <> oğlum mezbûr es-Seyyid Mehmed Ali’nin emvâli olup benim üzerime lâbise olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 15 Ra sene [1]242 Şühûdü’l-hâl: Ebûbekir Çelebi el-muhzır, Ali Ağa b. Veli, Dâmâdı Ahmed Ağa b. Mehmed, Feyzullah Çelebi el-muhzır.