Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 132 Hüküm no: 110 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Zühdü Paşazade Mehmed Salih Bey’in alacağını tahsil ve Kanlıca’daki yalısını satmak üzere Seyyid Hafız Hasan Efendi’yi vekil tayin etmesi İsbât-ı vekâlet hücceti Âsitâne-i aliyye ahâlisinden merhûm İsmail Zühdü Paşazâde Silahşorân-ı Hâssa’dan Mehmed Salih Beyefendi tarafından ber-vech-i âtî vekâlet iddi‘â eden işbu bâ‘isü’l-vesîka es-Seyyid Hafız Hasan Efendi b. el-Hâc Ali meclis-i şer‘-i şerîf-i enverde Celbuk v. Abram Yahûdî muvâcehesinde üzerine da‘vâ ve takrîr-i kelâm edip merkūm Mehmed Salih Beyefendi’nin mersûm Celbuk Yahûdî zimmetinde cihet-i karzdan elli guruş alacak hakkı olup meblağ-ı mezbûr elli guruşu mersûm Celbuk Yahûdî’den taleb ve da‘vâ ve ahz ü kabza ve ashâb-ı hayrâtdan İbrahim Ağa Evkāfı müsakkafâtından olup medîne-i Üsküdar’a muzâfe Yoros nâhiyesine tâbi‘ Kanlıcak karyesinde vâki‘ lede’l-ahâli ve’l-cîrân ma‘lûmü’l-hudûd ve’l-müştemilât bâ-temessük-i mütevellî bi’l-icâreteyn taht-ı tasarrufunda olan bir bâb sâhilhâneyi bedel-i misliyle bâ-re’y-i mütevellî âhara ferâğ ve tefvîze ve kabz-ı bedele ve makbûzumu kendüye îsâl ve teslîme ve husûs-ı mezkûrlar mütevakkıf olduğu umûrun küllîsine tarafından beni vekîl nasb ü ta‘yîn eylediğinde ben dahi vekâlet-i mezkûreyi kabûl etmemle meblağ-ı mezbûru mersûm Celbuk Yahûdî’den vekâlet-i mahkiyem hasebiyle taleb ederim suâl olunsun dedikde, gıbbe’s-suâl mersûm Celbuk Yahûdî dahi cevâbında merkūm Mehmed Salih Beyefendi’ye zimmetinde cihet-i mezbûreden elli guruş deyni olduğunu ikrâr müdde‘î-i merkūmun vekâleti ma‘lûmum değildir deyü inkâr edicek müdde‘î-i merkūmdan ber-vech-i muharrer müdde‘âsına mutâbık beyyine taleb olundukda udûl-i ahrâr-ı ricâl-i Müslimînden ve Âsitâne-i aliyye ahâlisinden es-Seyyid Mahmud Efendi b. es-Seyyid Halil ve es-Seyyid Mehmed Ali b. el-Hâc Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka merkūm Mehmed Salih Beyefendi’nin mersûm Celbuk Yahûdî zimmetinde cihet-i karzdan elli guruş alacak hakkını mersûm Celbuk Yahûdî’den taleb ve da‘vâ ve ahz ü kabza ve ashâb-ı hayrâtdan İbrahim Ağa Evkāfı müsakkafâtından olup medîne-i Üsküdar’a muzâfe Yoros nâhiyesine tâbi‘ Kanlıca karyesinde vâki‘ lede’l-ahâli ve’l-cîrân ma‘lûmü’l-hudûd ve’l-müştemilât bâ-temessük-i mütevellî ve bi’l-icâreteyn taht-ı tasarrufunda olan bir bâb sâhilhâneyi dahi bedel-i misliyle bâ-re’y-i mütevellî âhara ferâğ ve tefvîze ve kabz-ı bedele ve makbûzunu kendüye îsâle ve teslîme ve husûs-ı mezkûrların mütevakkıf olduğu umûrun küllîsine tarafından bizim huzûrumuzda işbu müdde‘î-i merkūm es-Seyyid Hafız Hasan Efendi’yi vekîl ve nâib-i menâb nasb ü ta‘yîn eylediğinde ol dahi ber-vech-i muharrer vekâlet-i mezkûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri müttefikü’l-lafz ve’l-ma‘nâ edâ-yı şehâdet-i şer‘iye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a [bi’t-taleb ketb olundu.] Fî 23 Ra sene [1]242 Şühûdü’l-hâl: Muhzır Ali Çelebi, Muhzır Abdulfettah Çelebi, Muhzır İsmail Çelebi, Muhzır Mehmed Çelebi.