Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 131 Hüküm no: 109 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Ömer’in yanında bulunan küçük oğlu Mehmed için babası Osman İzzet Efendi üzerine nafaka takdir olunması Husûs ile sagīr nafaka, 80 guruş Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Mevlana es-Seyyid Numan Efendi mahmiye-i İstanbul’da Çakır Ağa mahallesinde vâki‘ Osman İzzet Efendi b. el-Hâc Ali’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i Nebevî ettikde mezbûr Osman İzzet Efendi’nin zevce-i mutallakası olup zâtı Müslimûn-ı merkūmûn ta‘rîfleriyle mu‘arrefe olan işbu bâ‘isetü’l-vesîka Şerife Hadice bt. Ömer nâm hatun meclis-i ma‘kūd-ı mezkûrda merkūm Osman İzzet Efendi mahzarında takrîr-i kelâm ve ta‘bîr ani’l-merâm edip merkūm Osman İzzet Efendi ile zevciyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hacr ve terbiyemde olan tahmînen altı yaşında sagīr oğlu Mehmed’in malı olmayıp ol-vechile nafakaya muhtâc olmağla sagīr-i mezbûrun nafaka ve kisve-bahâsı için babası mezbûr üzerine kıbel-i şer‘den kadr-ı ma‘rûf meblağ farz ve takdîr buyurulmak bi’l-hıdâne matlûbumdur dedikde gıbbe’t-tasdîki’ş-şer‘î mevlana-yı merkūm sagīr-i mezbûrun nafaka ve kisve-bahâsı için babası merkūm üzerine bi’t-terâzî târih-i kitâbdan beher mâh seksen guruş nafaka farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisvesine harc ü sarfa ve lede’l-iktizâ istidâneye ve inde’z-zafer babası merkūm üzerine rücû‘a vâlidesi ve hâdinesi mezbûre Şerife Hadice Hatun’a izin vermeğin mevlana-yı merkūm mahâllinde ketb ü tahrîr ve ma‘an mürsel ümenâ-yı şer‘le meclis-i şer‘a gelip alâ-vukū‘ihî inhâ ve takrîr eylemeğin ba‘de’t-tenfîz mâ-vaka‘a [bi’t-taleb ketb olundu.] Fî 17 Ra sene [1]242. Şühûdü’l-hâl: İmâm-ı mahalle Mahmud Efendi, Mehmed Sadık Efendi, Süleyman Efendi, İsmail Efendi b. Ahmed, İbrahim Efendi, Çukadâr Mustafa Ağa, Muhzır Mehmed Çelebi.