Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 134 Hüküm no: 112 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Ömer’in berber gediğini Hacı Mehmed Ağa’ya satması Berber Gediği, 1000 guruş Mahmiye-i İstanbul’da Atik Ali Paşa kurbünde Molla Ahaveyn mahallesinde sâkin Hasan Ağa b. Ömer meclis-i şer‘-i şerîf-i enverde işbu bâ‘isü’l-vesîka el-Hâc Mehmed Ağa b. Ahmed mahzarında ikrâr-ı tam ve takrîr-i kelâm edip mahalle-i mezbûrede sâkin olduğum menzil tahtında vâki‘ bir bâb berber dükkânı derûnunda mevcûde Başmuhâsebe Kalemi’nde mukayyed beyne’l-esnâf gedik ta‘bîr olunur müstakıllen yedimde emvâlim olan beş ustura ve iki mikrâs [28b] ve iki tarak ve bir bileyi taşı ve dört yasdık ve bir minder ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm el-Hâc Mehmed Ağa’ya bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d âlât-ı muharrere-i mezkûre merkūm el-Hâc Mehmed Ağa’nın emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 15 Ra sene [1]242. Şühûdü’l-hâl. Muhzır Ebûbekir Çelebi, Muhzır Abdulfettah Çelebi, Muhzır Feyzullah Çelebi, Muhzır Ali Çelebi, Muhzır İsmail.