Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 135 Hüküm no: 113 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Alemdar’ın bıçakcı dükkânı gediğini Seyyid Yahya Ağa’ya satması Bıçakcı Gediği, 800 guruş Mahmiye-i İstanbul’da Küçükpazar kurbünde sâkin Halil Alemdar b. Mehmed tarafından husûs-ı âti’l-beyânda vekîl olduğu el-Hâc Mehmed Ali b. Halil ve es-Seyyid Osman b. Ali şehâdetleriyle sâbit olan Ali Ağa b. Mustafa meclis-i şer‘-i şerîf-i enverde işbu bâ‘isü’l-vesîka es-Seyyid Yahya Ağa b. Mustafa mahzarında bi’l-vekâle ikrâr-ı tam ve takrîr-i kelâm edip mahmiye-i mezbûrede Mahmudpaşa kurbünde Kazancılar sokağında enserci ve kazgancı dükkânları beynlerinde kâin bir bab tütün bıçakçısı dükkânı derûnunda mevcûde beyne’l-esnâf gedik ta‘bîr olunur bir örs ve üç çekiç ve bir kürk ve bir kantar ve bir mengene ve sâir âlât-ı lâzıme-i ma‘lûmenin nısfları müvekkilim merkūmun ve nısf-ı âharları merkūm Yahya Ağa’nın ale’l-iştirâk yedlerinde emvâlleri olmağla âlât-ı muharrere-i mezkûrede müvekkilim merkūmun ber-i‘tibâr-ı mezkûr mâlik olduğu nısf hisse-i sâbıkāsını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müşteri-yi merkūm Yahya Ağa’ya sekiz yüz guruşa bi’l-vekâle bey‘ ü temlik ve vech-i lâyıkı üzere bi’l-vekâle teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr sekiz yüz guruşu müşteri-yi mezbûr bana def‘ ü teslîm ben dahi yedinden bi’l-vekâle tamamen ahz ü kabz eyledim, fîmâ-ba‘d âlât-ı muharrere-i mezkûrenin mecmû‘u mezbûr es-Seyyid Yahya Ağa’nın emvâl-i müşterâsı ve hakk-ı sırfı olup <> müvekkilim mezbûr Halil Alemdar’ın kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan merkūm Yahya Ağa’nın zimmetini bi’l-vekâle ve bi’l-izâfe ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 24 Ra sene [1]242 Şühûdü’l-hâl: es-Seyyid Mehmed Ali b. Halil, Yiğitbaşı es-Seyyid Halil Usta, Mustafa Usta, Muhzır Ebûbekir Çelebi, Muhzır Ali Çelebi, Muhzır Mehmed Çelebi, Muhzır Fettah Çelebi