Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 137 Hüküm no: 116 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melen kazasının Bayramviran köyünden Ahmed b. Süleyman’ın menzilinin yarı hissesini oğlu Hüseyin’e satması Nısf hisse-i menzil 125 guruş Fi’l-asl vilâyet-i Anadolu’da Kengiri (Çankırı) sancağında Melen kazâsına tâbi‘ Bayramviran karyesi ahâlisinden olup mahmiye-i İstanbul’da Kuşakçı Hanı’nda Ahmed b. Süleyman meclis-i şer‘-i şerîf-i enverde sulbî kebîr oğlu işbu bâ‘isü’l-vesîka Hüseyin mahzarında ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup sâlifü’z-zikr Bayramviran karyesinde vâki‘ etrâf-ı erba‘ası tarîk-i âm ile mahdûd iki oda ve bir sofa ve bir kenîf ve bir anbar ve bir ahır ve bir samanhâneyi müştemil bir bâb mülk menzilin nısf-ı şâyi‘i yedimde ibkā ve nısf-ı şâyi‘-i âharını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile oğlum mezbûr Hüseyin’e yüz yirmi beş guruşa bey‘ ü temlik ve mahâllinde vech-i lâyıkı üzere zabta tarafımdan oğlum mezbûru taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yüz yirmi beş guruşu oğlum müşteri-yi merkūm bana def‘ ü teslîm ben dahi yedinden tamamen ve kâmilen ahz ü kabz eyledim, fîmâ-ba‘d menzil-i mahdûd-ı mezkûrun nısf-ı şâyi‘i oğlum müşteri-yi mezbûrun mülk-i müşterâsı ve hakk-ı sırfı olup benim nısf-ı şâyi‘inde kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ ve iskāt ve tarafeynden her birimiz âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 23 Ra sene [1]242. Şühûdü’l-hâl: Kuşakçı Mustafa b. Mehmed, Muhzır Ali Çelebi, Muhzır Mehmed Çelebi.