Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 137 Hüküm no: 117 Orijinal metin no: [28b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haydarzade Şerif Mehmed Ağa’nın Serkiz v. Kalost’u vekil tayin etmesi Vekâlet hücceti Medîne-i Tokat mahallâtından Mahmudpaşa mahallesi ahâlisinden olup medîne-i Hazret-i Ebâ Eyyûb El-ensârî -radiye anhu Rabbihi’l-bârî’de- sâkin Haydarzâde Şerif Mehmed Ağa b. Mehmed Emin meclis-i şer‘-i şerîf-i enverde sarrâf tâifesinden işbu hâmilü’r-rakīm Serkiz v. Kalost zimmî muvâcehesinde ikrâr-ı tam ve takrîr-i kelâm edip mahalle-i mezbûrede vâki‘ ma‘lûmü’l-hudûd bahçe ve müştemilât-ı ma‘lûmeyi hâvî mâlik olduğum bir bâb mülk menzilin yedi senede müctemi‘ olan icâresini gelinim olup bundan akdem fevt olan Fatıma’nın terekesine vâzı‘ü’l-yed olanlardan ve ittisâlinde kâin mâlik olduğum bir bâb hamamın yedi senede kezâlik müctemi‘ olan icâresini müsteciri olan İbrahim Ağa’dan ve medîne-i mezbûreye tâbi‘ Behram karyesinde sâkin Kara Mehmed zimmetinde cihet-i karzdan alacağım olan beş yüz guruşu ve otuz beş …? hıntamı ve beynimizde ma‘lûm dört senelik fâizi merkūmdan ve Madasi karyesinde vâki‘ bâ-berât mutasarrıf olduğum mâlikânemin kırk bir ve kırk iki senesi ta‘şîrâtından hâsıl olan ma‘lûmü’l-mikdâr mahsûlü vâzı‘ü’l-yed olanlardan ve Torbaoğlu Osman zimmetinde alacağım olan üç yüz elli guruşu ve Boz Osman’dan ve Mevlevîhâne Şeyhi Efendi zimmetinde karzdan alacağım olan üç yüz guruşu efendi-yi merkūmdan ve mevlevîhâne kurbünde vâki‘ [29a] mâlik olduğum bir bâb hanımın icâresi müsteciri olan kimesneden ve Hallaçlar Çarşısı’nda vâki‘ mâlik olduğum dört bâb hallâç dükkânlarımın kırk aylık icâresini müstecirlerinden ve Maraşlı Veliyüddin Efendi zimmetinde alacağım olan altı yüz yedi guruşu merkūmdan taleb ve da‘vâ ve ahz ü kabza ve sâlifü’l-beyân menzilin ve hamam ve Hüseyin Ağa’nın konağında mevcûde eşyâ-yı ma‘lûmemden ancak bin vakıyye yünümü semen-i misilleriyle âhara bey‘ ve kabz-ı semene ve sâlifü’z-zikr mâlikâneyi âhara iltizâma ve hasran vârisi olduğum yeğenim müteveffâ Ahmed b. Abdurrahman’ın malı olup gelinim müteveffât Fatıma’nın yed ve hıfzında olan otuz bir aded bâ-defter eşyâ-yı ma‘lûmemi ve vâlidem olup bundan akdem fevt olan Âişe Hatun’un terekesinden benim bi’l-irsi’ş-şer‘î malım olup kezâlik gelinim müteveffât-ı mezbûrenin yed ve hıfzında olan altmış dört parça eşyâ-yı ma‘lûmemi tereke-i müteveffât-ı mezbûreye vâzı‘ü’l-yed olanlardan kezâlik taleb ve da‘vâ ve ahz ü kabza ve kezâlik semen-i misilleriyle âhara bey‘e ve kabz-ı semene ve sâir zimem-i nâsda zuhûr eden hukūkumu erbâbından kezâlik taleb ve da‘vâ ve ahz ü kabza ve makbûzunu bana îsâl ve teslîme tarafımdan mersûm Serkiz zimmîyi vekîl nasb ü ta‘yîn eyledim dedikde, ol dahi ber-vech-i muharrer vekâlet-i mezbûreyi kabûl ve merâsimi kemâ-yenbagī mahâllinde edâya ta‘ahhüd ve iltizâm eylemeğin mâ-vaka‘a [bi’t-taleb ketb olundu.] Fî 27 Ra sene [1]242. Şuhudü’l-hâl: Es-Seyyid Hüseyin b. Hasan, el-Hâc Mehmed Salih Ağa b. Mustafa, Kuzuoğlu es-Seyyid Mehmed, Muhzır Ali Çelebi, Muhzır İbrahim Çelebi