Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 140 Hüküm no: 120 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Mehmed’in eşi topçu Mehmed Emin’den muhâlaa usulüyle boşanması Muhâla‘a hücceti Mahmiye-i İstanbul’da Küçükmustafapaşa kurbünde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Zeyneb bt. Mehmed nâm hatun meclis-i şer‘-i şerîf-i enverde zevc-i muhâlı‘ı işbu bâ‘isü’l-vesîka Topçu Mehmed Emin b. Mehmed mahzarında ikrâr-ı tam ve takrîr-i kelâm edip lâkin beynimizde hüsn-i mu‘âşeretimiz olmamağla bu def‘a bedel-i hul‘ olmak üzere zevcim mezbûra yirmi guruş def‘ ü teslîm ol dahi ahz eylediği yirmi guruş ile zimmetinde mütekarrir ve ma‘kūdün-aleyh olan otuz bir guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim merkūm Mehmed Efendi ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetden işbu târih-i vesîkaya gelince sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 25 Ra sene [1]242. Şühûdü’l-hâl: Muhzır İbrahim Çelebi, Muhzır İsmail Çelebi.