Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 148 Hüküm no: 132 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uluborlulu Seyyid Hasan’ın arsasını Tömbekicizade Hacı Hüseyin’e satması Arsa mübâya‘ası 25 guruş Vilâyet-i Anadolu’da Isparta kazâsına tâbi‘ Uluborlu karyesinde Tahtapazar mahallesi ahâlisinden olup mahmiye-i İstanbul’da Sultan Mehmed kurbünde sâkin es-Seyyid Hasan b. Mehmed meclis-i şer‘-i şerîf-i enverde işbu bâ‘isü’l-vesîka Tömbekicizâde el-Hâc Hüseyin Efendi b. Mustafa b. Abdullah tarafından husûs-ı âti’l-beyânda vekîl olduğu Gelenzâde? es-Seyyid Ahmed Efendi b. Ömer ve es-Seyyid Mustafa Efendi b. Osman şehâdetleriyle sâbit olan es-Seyyid Mehmed Emin Efendi b. İbrahim mahzarında ikrâr-ı tam ve takrîr-i kelâm edip mahalle-i mezbûrede vâki‘ bir tarafdan Nalband Veli Hacıoğlu Hüseyin menzili ve üç tarafdan tarîk-i âm ile mahdûd bir bâb menzil arsamı bin ikiyüz otuz beş senesi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i mezbûr el-Hâc Hüseyin Efendi’ye yirmi beş guruşa bey‘ ü temlik ve mahâllinde zabta tarafımdan merkūmu taslît eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruşu müşteri-yi merkūm târih-i mezbûrda bana def‘ ü teslîm ben dahi yedinden tamamen ahz ü kabz edip arsa-i mahdûd-ı mezkûr târih-i mezbûrdan beri müvekkil-i merkūmun mülk-i müşterâsı ve hakk-ı sırfı olup benim târih-i mezbûrdan beri kat‘a alâka ve medhalim kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 28 Ra sene [1]242 Şühûdü’l-hâl: Kürtzâde Süleyman Efendi, Karaşabanzâde el-Hâc Mehmed Efendi, Emirzâde Ali Efendi.