Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 148 Hüküm no: 131 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Kalost ve kız kardeşi Makderina’nın kiseci dükkânı gediğini Prabyon bt. Karabet’e satmaları Kîseci gediği, 1250 guruş Medîne-i Hazret-i Ebâ Eyyûb El-ensârî -radiye anhu Rabbihi’l-bârî- civârında Arpa Emîni Çeşmesi kurbünde mütemekkinler Adon ve kız karındaşı şahsını zeyl-i rakīmde muharrerü’l-esâmî kimesneler ta‘rîfleriyle mu‘arrefe olan Makderina evlâd-ı Kalost zimmîler meclis-i şer‘-i hatîr-i lâzımü’t-tevkīrde işbu hâmilü’r-rakīm Prabyon bt. Karabet Nasrâniyenin oğlu ve tarafından husûs-ı âtîde tasdîka vekîl-i şer‘îsi Karabet v. İstati zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Çukacılar Hanı karşısında köşede vâki‘ ma‘lûmü’l-hudûd bir bâb kîseci dükkânı derûnunda mevcûde beyne’l-esnâf gedik ta‘bîr olunur yedimizde irsen emvâlimiz olan bâ-defter-i müfredât âlât-ı lâzıme-i ma‘lûmemizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûme Prabyon Nasrâniyeye bin iki yüz elli guruşa bey‘ ü temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan mebla‘-ı mezbûr bin iki yüz elli guruşu müşteriye-i mersûme bize def‘ ve teslîm, biz dahi yedinden tamamen ahz ü kabz eyledik, fîmâ-ba‘d âlât-ı muharrere-i mezkûre mersûme Prabyon Nasrâniyenin emvâl-i müşterâsı ve hakk-ı sırfı olup bizim kat‘a alâka ve medhalimiz kalmamağla mebî‘-i mezkûrun tağrîr ve gabnine müte‘allika da‘vâdan mersûme Prabyon Nasrâniyenin zimmetini kabûlü hâvî ibrâ ve iskāt eyledik, ol dahi ber-vech-i muharrer ibrâ-yı mezkûrumuzu kabûl eyledi dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 28 Ra sene [1]242. Şühûdü’l-hâl: Muhzır Emin Çelebi, Muhzır Ali Çelebi Margos v. Moğsis, Abraham v. Serope zimmîler.