Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 300 Hüküm no: 334 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Brosini bt. Panayot’un Heybeli Ada’daki menzilini satması Menzil mübâya‘ası, 2000 guruş. Medîne-i Üsküdar’a muzâfe Kartal nâhiyesine tâbi‘ Heybeli Ada re‘âyâsından olup mahrûse-i Galata’da mütemekkine ve şahsını zeyl-i rakīmde muharrerü’l-esâmî kimesneler ta‘rîfleriyle mu‘arrefe olan Brosini bt. Panayot nâm Nasrâniye meclis-i şer‘-i hatîr-i lâzımü’t-tevkīrde işbu hâmilü’r-rakīm Pişmişoğlu Mikâil v. Karabet zimmî tarafından husûs-ı âtîde tasdîka vekîl-i şer‘îsi Arakil v. Bogos zimmî muvâcehesinde ikrâr-ı tam ve takrîr-i kelâm edip mârrü’z-zikr Heybeli Ada’da vâki‘ bir tarafdan Çorbacı Togofilo zimmî menzili ve bir tarafdan Terzi Dimitri zimmî menzili ve bir tarafdan benim âhar menzilim ve bir tarafdan leb-i deryâ ile mahdûd altı bâb oda ve bir mikdâr havluyu müştemil bâ-mülknâme-i hümâyûn yedimde müstakılleten mülküm olan bir bâb menzilimi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Mikâil zimmîye iki bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr iki bin guruşu müşteri-yi mersûm bana def‘ ü teslîm, ben dahi yedinden tamamen ahz ü kabz eyledim, fîmâ-ba‘d menzil-i mahdûd-ı mezkûr mersûm Mikâil zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan mersûm Mikâil zimmînin zimmetini kabûlü hâvî ibrâ ve iskāt eylediğimde, ol dahi ber-vech-i muharrer ibrâ-yı mezkûrumu kabûl eyledi dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 3 B sene [1]242. Şühûdü’l-hâl: Mustafa Efendi, Muhzır Ali, Muhzır Ebûbekir Çelebi.