Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 301 Hüküm no: 335 Orijinal metin no: [58b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha bt. Abdullah’ın bazı ev eşyalarını satması Husûs ile eşyâ mübâya‘ası, 450 guruş. Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan mevlana Mehmed Necmeddin Efendi mahmiye-i İstanbul’da Süleymâniye kurbünde Kaptan Paşa Câmi‘-i şerîfi civârında vâki‘ Ahmed Bey b. el-Hâc Mehmed Emin’in konağına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde menzil-i mezkûrda müsâfereten sâkine ve zâtı Müslimûn-ı merkūmûn ta‘rîfleriyle mu‘arrefe olan Zeliha bt. Abdullah nâm mu‘taka meclis-i ma‘kūd-ı mezkûrda işbu bâ‘isü’l-vesîka mezbûr Ahmed Bey mahzarında ikrâr-ı tam ve takrîr-i kelâm edip eşyâ-yı memlûkemden yün memlû beş minder ve müsta‘mel on iki çatma yasdık ve üç şayak mak‘ad ve bir orta keçesi ve bir döşek ve iki şilte ve iki Kıbrıs-kârî yorgan ve üç entari ve bir kısa nâfe kürk ve iki gömlek ve iki şalvar ve bir çuka ferâce ve bir güğez serpme Lahûrî şal ve dört tencere ma‘a kapak, ve bir tâbe ve iki tepsi ve bir mangal ve sekiz sahan ma‘a kapak ve bir lenger ve bir tas ve bir leğen-ibrik ve bir güğümümü tarafeynden [îcâb] ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Ahmed Bey’e dört yüz elli guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr dört yüz guruşu müşteri-yi merkūm bana def‘ ü teslîm, ben dahi yedinden tamamen ahz ve kendi umûruma sarfla istihlâk eyledim, fîmâ-ba‘d eşyâ-yı muharrere-i mezkûr merkūm Ahmed Bey’in emvâl-i müşterâsı ve hakk-ı sırfı olup benim kat‘a alâka ve medhalim kalmadığından mâ‘adâ işbu derûnunda akd-i meclis olunan menzilde mevcûde bi’l-cümle esâs-ı beyt ve melbûsât ve mefrûşât ve evânî-i nühâsiye ve gayr-ı nühâsiyenin mecmû‘u merkūm Ahmed Bey’in malı olup benim üzerime lâbise olduğum köhne libâsımdan gayrı ism-i mâl ıtlâk olunur bir nesnem yokdur dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 4 B sene [1]242. Şühûdü’l-hâl: Mehmed Salim Ağa b. Ali, es-Seyyid İzzet Bey b. Mehmed Sadık, Müezzin es-Seyyid Mustafa Efendi b. Osman, es-Seyyid Hüseyin Ağa b. Ahmed, Muhzır İbrahim Çelebi.