Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 321 Hüküm no: 358 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe’nin vefat eden annesinden intikal eden Çömlekçi dükkânı gediğini satması Mübâya‘a, 1000 guruş Mahmiye-i İstanbul’da Kemalpaşa mahallesinde sâkin iken bundan akdem fevt olan Âişe bt. Mehmed’in oğlu ve hasran vârisi olduğu lede’ş-şer‘i’l-enver zâhir olan İsmail Beşe b. Ali meclis-i şer‘-i şerîf-i enverde işbu bâ‘isü’l-vesîka es-Seyyid Hasan Ağa b. es-Seyyid Musa mahzarında ikrâr-ı tam ve takrîr-i kelâm edip mahmiye-i mezbûrede Sultan Bâyezid-i Veli Câmi‘-i şerîfi havlusunda çömlekçiler sûkunda vâki‘ ma‘lûmü’l-hudûd bir bâb çömlekçi dükkânı derûnunda mevcûde beyne’l-esnâf gedik ta‘bîr olunur bir pîş-tahta ve bir akçe tahtası ve bir minder ve bir iskemle ve sâir âlât-ı lâzıme-i ma‘lûme mûrisem vâlidem müteveffât-ı mezbûre Âişe Hatun’un hayatında ile’l-vefât bâ-hüccet-i şer‘iye müstakılleten yedinde emvâli olup ba‘de vefâtihî ancak bana mevrûs olmağla ben âlât-ı muharrere-i mezkûreyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide [62a] ile mezbûr es-Seyyid Hasan Ağa’ya bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr bin guruşu müşteri-yi merkūm bana def‘ ü teslîm, ben dahi yedinden tamamen ahz ü kabz eyledim, fîmâ-ba‘d âlât-ı muharrere-i mezkûre mezbûr es-Seyyid Hasan Ağa’nın emvâl-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 18 B sene [1]242. Şühûdü’l-hâl: Muhzır Mehmed Çelebi, es-Seyyid el-Hâc Hüseyin Kethudâ Ağa, Yiğitbaşı Şeyh Yakub Efendi, Mehmed Sadık Ağa, Ali Beşe, Molla Ahmed, Muhzır Ebûbekir Çelebi, Muhzır Ali Çelebi