Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 320 Hüküm no: 357 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı Yovakim’in Arabsun’un Sineson köyündeki bağını satması Bağ mübâya‘ası 75 guruş Vilâyet-i Anadolu’da Ankara sancağında Arabsun kazâsına tâbi‘ Sineson karyesi re‘âyâsından olup mahrûse-i Galata’da Balıkpazarı’nda mütemekkin Havyarcı Yovakim v. Pretamos zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Astori v. Yuvan zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup karye-i mezbûrede Özbeyi? Çayı’nda vâki‘ bir tarafdan mersûm Astori zimmî bağı ve üç tarafdan ba‘zan çay ve ba‘zan tarîk-i âm ile mahdûd tahmînen iki dönüm mikdârı bir kıt‘a kürûmu mülk bağımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Astori zimmîye yetmiş beş guruşa bey‘ ü temlik ve mahâllinde zabta tarafımdan mersûmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yetmiş beş guruşu müşteri-yi mersûm bana def‘ ü teslîm ben dahi yedinden tamamen ahz ü kabz eyledim, fîmâ-ba‘d bağ-ı mahdûd-ı mezkûr mersûm Astori zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu. Fî 18 B sene [1]242. Şühûdü’l-hâl: Muhzır Ebûbekir Çelebi, Muhzır İsmail Çelebi, Muhzır Ali Çelebi, Kalkados v. Kostandi, Vasil v. Yuvan.