Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 322 Hüküm no: 360 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babe bt. Matyos’un menzil ve müştemilatının bir kısmını ifraz ederek satması Müfrez Arsa mübâya‘ası, 6000 guruş Mahrûse-i Galata hâricinde Tomtom mahallesinde mütemekkine Babe bt. Matyos Nasrâniyenin zevci ve tarafından husûs-ı âti’l-beyânda ikrâra vekîl olduğu şahsını bilir Yani v. Kostanti ve Yani v. Nikola zimmîler şehâdetleriyle sâbit olan neccâr kalfalarından Nikola Kalfa v. Lobizo zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm Marya bt. Lorenco Ermiko? Nasrâniye tarafından kezâlik husûs-ı âtîde tasdîka vekîl-i şer‘îsi İlya v. Nikola zimmî muvâcehesinde bi’l-vekâle ikrâr-ı tam ve takrîr-i kelâm edip müvekkilem zevcem mersûme Babe Nasrâniye müstakılleten yedimde mülküm olan mahalle-i mezbûrede vâki‘ bir tarafdan Yazıcı menzili ve iki tarafdan tarîk-i hâs ve bir tarafdan tarîk-i âm ile mahdûd müştemilât-ı ma‘lûme ve bir mikdâr arsa-i hâliye ve üzerinde mevcûde enkāz ve üç sokak kapısını müştemil mukāta‘alu mülk menzilin ve etrâfından tûlen altı ve arzan on dokuz be-hesâb-ı terbî‘î yüz yirmi zirâ‘ arsa ve üzerinde mevcûde enkāz-ı mevcûde ve bir sokak kapısını ifrâz ve alâmât-ı fâsıla vaz‘ıyla imtiyâz birle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûme Marya Nasrâniye’ye altı bin guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr altı bin guruşu müşteriye-i müvekkile-i mersûme bana def‘ ü teslîm ben dahi yedinden tamamen ve kâmilen ahz ü kabz eyledim fîmâ-ba‘d arsa-i müfreze-i mezkûre bi’l-cümle enkāz-ı mevcûdesiyle mersûme Marya Nasrâniyenin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan mersûme Marya Nasrâniye’nin zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 21 B sene [1]242. Şühûdü’l-hâl: Muhzır Emin Çelebi, Muhzır Ali Çelebi