Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 323 Hüküm no: 361 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lekeci Rado’nun Lekeci Seyyid Süleyman aleyhindeki lekeci dükkânı gediği davasında anlaşma sağlanması 500 guruş sulh, ibrâ, Mahmiye-i İstanbul’da Kocamustafapaşa mahallesinde mütemekkin Lekeci Rado v. Yuvan zimmî meclis-i şer‘-i hatîr-i lâzımü’t-tevkīrde işbu bâ‘isü’l-vesîka Lekeci es-Seyyid Süleyman b. İbrahim mahzarında ikrâr-ı tam ve takrîr-i kelâm edip mahmiye-i mezbûrede Sultan Bâyezid Câmi‘-i şerîfi havlusunda Kökçüler kapısı civârında kitapçı ve berber dükkânları beynlerinde kâin bir bâb lekeci dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme benim emvâlim olup sen bi-gayrı hakkın fuzûlen zabt ve isti‘mâl etmenle âlât-ı muharrere-i mezkûreden keff-i yed ve bana teslîm eyle deyü ben bundan akdem merkūm es-Seyyid Süleyman’dan da‘vâya tasaddî etmiş idim. Lâkin benim ber-vech-i muharrer tasaddî eylediğim da‘vâmın kat‘a aslı olmayıp ben da‘vâmda kâzib olmamla ancak merkūm es-Seyyid Süleyman teberru‘an bana malından beş yüz guruş def‘ ü teslîm ben dahi yedinden ahz ü kabz ve mezbûr es-Seyyid Süleyman’ın emriyle umûruma sarfla istihlâk edip husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan ben merkūm es-Seyyid Süleyman’ın zimmetini <> ol dahi meblağ-ı müstehlek-i merkūmun istirdâdına ve sâir cemî‘ hukūk-ı Şer‘iyyeye müte‘allika âmme-i da‘vâdan benim zimmetimi her birimiz ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 18 B sene [1]242. Şühûdü’l-hâl: Muhzır Ebûbekir Çelebi, Mustafa Ağa, diğer Mustafa Ağa, Muhzır İsmail Çelebi, Muhzır Ali Çelebi.