Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 347 Hüküm no: 394 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aydın’ın Karasu kazasındaki bağ hissesini Debbağzade Osman Ağa’ya satması Bağ mübâya‘ası, 370 guruş. Mahmiye-i İstanbul’da Kādıçeşmesi kurbünde Müftü Ali mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Hamduna? bt. el-Hâc Halil nâm hatun meclis-i şer‘-i şerîf-i enverde işbu bâ‘isü’l-vesîka Debbâğzâde Osman Ağa b. Abdullah tarafından husûs-ı âtîde tasdîka vekîl-i şer‘îsi Ahmed Ağa b. Mehmed mahzarında ikrâr-ı tam ve takrîr-i kelâm edip vilâyet-i Anadolu’da Aydın sancağında Karasu kazâsında Sağrıcı nâm mahâlde vâki‘ bir tarafdan Ağa bağı ve bir tarafdan Ahmed Efendi bağı ve bir tarafdan Hasan İzzet bağı ve bir tarafdan tarîk-i âm ile mahdûd sekiz dönüm mikdârı kürûmu mülk bağ üç sehm i‘tibârıyla bir sehmi benim ve iki sehmi âharın yedimizde ale’l-iştirâk mülk ve hakkımız olmağla ben bağ-ı mahdûd-ı mezkûrda ber-i‘tibâr-ı mezkûr mâlik olduğum bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i merkūm Osman Ağa’ya üç yüz yetmiş guruşa bey‘ ü temlik ve mahâllinde vech-i lâyıkı üzere zabta tarafımdan müvekkil-i merkūmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr üç yüz yetmiş guruşu müşteri-yi merkūm bana def‘ ü teslîm, ben dahi yedinden tamamen ahz ü kabz eyledim, fîmâ-ba‘d bağ-ı mahdûd-ı mezkûrun bir sehmi müvekkil-i merkūm Osman Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan müvekkil-i merkūmun zimmetini ibrâ ve iskāt eylediğimde ol dahi ibrâ-yı mezkûrumu kabûl eyledi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 6 Ş sene [1]242. Şühûdü’l-hâl: Es-Seyyid el-Hâc Ahmed Ağa, Hafız Süleyman Ağa, Muhzır Mehmed Çelebi, Muhzır Ali Çelebi.