Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 346 Hüküm no: 393 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdisar ve Nikagos’un kiraz çubuklarını Rapayel v. Artin’e satmaları Çubuk Bey‘i 13900 guruş Mahmiye-i İstanbul’da Vâlidehanı’nda mütemekkinler Bağdisar v. Gaspar ve şerîki Nikigos v. Simyon zimmîler meclis-i şer‘-i hatîr-i lâzımü’t-tevkīrde işbu hâmilü’r-rakīm Rapayel v. Artin zimmî muvâcehesinde her biri ikrâr-ı tam ve takrîr-i kelâm edip biz ale’l-iştirâk malımız olan yedi bin beşyüz aded kiraz çubuklarımızı târih-i vesîkadan yirmi beş gün mukaddem tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Rapayel zimmîye on üç bin dokuz yüz guruşa bey‘ ü temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı mezbûr on üç bin dokuz yüz guruşu müşteri-yi mersûm târih-i mezkûrda bize def‘ ü teslîm biz dahi yedinden tamamen ahz ü kabz edip sâlifü’l-beyân çubuklar târih-i mezkûrdan beri mersûm Rapayel zimmînin emvâl-i müşterâsı ve hakk-ı sırfı olup bizim târih-i mezbûrdan beri kat‘a alâka ve medhalimiz kalmamağla mebî‘-i mezkûrun tağrîr ve gabnine müte‘allika âmme-i da‘vâdan herbirimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve tarafeynden her birimiz âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ş sene [1]242. Şühûdü’l-hâl: Ali Çelebi el-muhzır, Mehmed Çelebi el-muhzır, Mehmed Emin Çelebi el-muhzır, Abdulfettah Çelebi el-muhzır.