Bab Mahkemesi 54 Numaralı Sicil (H. 1102 / M. 1691) cilt: 20, sayfa: 148 Hüküm no: 141 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ahmed Efendi b. Seyyid Mehmed’in kölesi Kenan’ı azat etmesi Dârü’l-hilâfeti’l-aliyye Kostantıniyye el-mahmiye mahallâtından Hoca Hayreddin mahallesinde sâkin mefharu’l-kuzâti’l-müteşerri‘în es-Seyyid Ahmed Efendi b. el-merhûm es-Seyyid Mehmed nâm kimesne meclis-i şer‘-i şerîf-i enverde ve mahfil-i dîn-i münîf-i ezherde ikrâr-ı sahîh-i şer‘î ve i‘tirâf-ı sarîh-i mer‘î kılıp, bana rıkkını mu‘terif olan işbu orta boylu, açık kaşlı, sarı elâ gözlü Rûsiyyü’l-asl râfi‘ü hâze’l-kitâb Kenan b. Abdullah’ı hasbeten lillâhi’l-meliki’l-hallâk ve taleben li merzâti’r-rabbi’r-rezzâk mâlımdan tahrîr ve i‘tâk ve kazâ-yı ahr[râr-ı asliyyîne] idrâc ve ilhâk eyledim. Ba‘de’l-yevm mevsûf-ı mezbûr Kenan üzerinde velâ-i şer‘îden gayri hak ve alâkam kalmayıp, sâir ahrâr-ı asliyyîn gibi hür olmuşdur dedikde, işbu vesîka mâ hüve’l-vâki‘ [bi’t-taleb] ketb olundu. Fi’l-yevmi’s-sâbi‘ min Cemâziyelevvel li sene 1102. Şuhûdü’l-hâl: El-Hâc İbrahim b. Ali, el-Hâc Mustafa b. Ahmed, Halil Beşe b. Yusuf, Esad Çelebi berber, Mehmed b. Abdülkādir, Hasan Beşe b. Hüseyin, İbrahim Çelebi b. el-Hâc Ahmed, Süleyman b. Abdullah.