Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 407 Hüküm no: 471 Orijinal metin no: [75b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Aci Kirkor ve kardeşinin kürkçü dükkânı gediğini İsmail Ağa’ya satmaları Oda gediği, 2500 guruş Mahmiye-i İstanbul’da Langa Yenikapısı kurbünde Musalla nâm mahâlde mütemekkinler Kürkçü esnâfından Aci Kirkor ve karındaşı Asvador veledey Bedros zimmîler meclis-i şer‘-i hatîr-i lâzımü’t-tevkīrde işbu bâ‘isü’l-vesîka dergâh-ı âlî kapıcıbaşılarından sâbıkā Drama Nâzırı İsmail Ağa b. Mustafa tarafından husûs-ı âtîde tasdîka vekîl-i şer‘îsi Ebûbekir İzzet b. İbrahim mahzarında her biri ikrâr-ı tam ve takrîr-i kelâm edip mahmiye-i mezbûrede Çilingirler kurbünde Sinanpaşa Hanı’nda nerdubân başında ( ) odası ile Kürkçü Serkiz odası derûnunda mevcûde beyne’l-esnâf gedik ta‘bîr olunur bi’l-irsi’ş-şer‘î ale’l-iştirâki’s-seviyy [76a] yedimizde emvâlimiz olan bir meşîn ve bir mikrâs ve bir bıçak ve sâir âlât-ı lâzıme-i ma‘lûmelerimizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müvekkil-i merkūm İsmail Ağa’ya iki bin beş yüz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikdensonra semeni olan meblağ-ı mezbûr iki bin beş yüz guruşu müşteri-yi müvekkil-i merkūm bize def‘ ü teslîm biz dahi yedinden tamamen ve kâmilen ahz ü kabz eyledik, fîmâ-ba‘d âlât-ı muharrere-i mezkûre müvekkil-i merkūm İsmail Ağa’nın emvâl-i müşterâsı ve hakk-ı sırfı olup bizim kat‘a alâka ve medhalimiz kalmamağla mebî‘-i mezkûrun tağrîr ve gabnine müte‘allika da‘vâdan müvekkil-i merkūmun zimmetini ibrâ ve iskāt eylediğimizde ol dahi ber-vech-i muharrer ibrâ-yı mezkûrumuzu kabûl eyledi dediklerinde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 13 N sene [1]242. Şühûdü’l-hâl. Muhzır Mehmed, İsmail Ağa, Selim Ağa, Mehmed Ağa, Muhzır Ali Çelebi, Aci Mıgırdıç v. Serkiz, Nikagos v. Vartan.