Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 417 Hüküm no: 486 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt Süleyman’ın eşi Mustafa’dan muhâlaa usulüyle boşanması Muhâla‘a, ibrâ Mahmiye-i İstanbul’da Kumkapı kurbünde Süleyman Ağa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Hadice bt. Süleyman nâm hatun meclis-i şer‘-i şerîf-i enverde zevc-i muhâlı‘ı işbu bâ‘isü’l-vesîka Mustafa b. Abdullah mahzarında ikrâr-ı tam ve takrîr-i kelâm edip merkūm Mustafa zevc-i dâhilim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan yüz elli guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim merkūm Mustafa ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl benim merkūm Mustafa zimmetinde bir tahta sandık derûnunda mevcûde eşyâ-yı ma‘lûmemden mâ‘adâ hukūk-ı zevciyete ve ibtidâ-yı zevciyetden işbu târih-i vesîkaya gelince sâir hukūk-ı şer‘iyeye müte‘allika da‘vâdan zevcim mezbûrun zimmetini, ânın dahi benim yed ve hıfzımda olan bir hilâlî gömlek ve bir çevre ve bir akçe kesesinden mâ‘adâ hukūk-ı zevciyete ve ibtidâ-yı zevciyetden işbu târih-i vesîkaya gelince sâir beynimizde cereyân eden cemî‘ hukūk-ı şer‘iyeye müte‘allika da‘vâdan benim zimmetimi her birimiz ibrâ ve iskāt eyleyip ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 11 N sene [1]242. Şühûdü’l-hâl: Muhzır Emin Çelebi, Mehmed b. İsmail, Muhzır Ali Çelebi.