Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 416 Hüküm no: 485 Orijinal metin no: [77a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayazma kapısı haricinde Şahinoğlu ve Papasoğlu dükkânları arasındaki keresteci dükkânının yarısının Yuvan v. Kozma’ya ait olduğunun tescili İhbâr hücceti, Mahmiye-i İstanbul’da Ayazma kapısı kurbünde mütemekkin Keresteci esnâfından Yuvan v. Kozma zimmî meclis-i şer‘-i hatîr-i lâzımü’t-tevkīrde yine esnâf-ı mezbûreden Ligor v. İlya ve İskender v. Yuvan zimmîler hâzır oldukları hâlde takrîr-i kelâm ve ta‘bîr ani’l-merâm edip mahmiye-i mezbûrede Ayazma kapısı hâricinde Şahinoğlu ve Papasoğlu dükkânları beynlerinde kâin bir bâb keresteci dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûme dört sehm i‘tibârıyla bir sehmi irsen ve bir sehmi Vasil zimmîden şirâen benim ve iki sehmi Aci Yuvan zimmînin müddet-i vâfireden beri emvâlimiz olup lâkin yedimde sened-i şer‘iyem olmayıp hakīkat-i hâl hâzırân-ı mersûmândan lede’l-istihbâr kıbel-i şer‘den li-ecli’l-istihkâm yedime bir kıt‘a hüccet-i şer‘iye i‘tâ olunmak matlûbumdur dedikde hâl bâlâda bast olunan minvâl üzere olup zikr olunan dükkân derûnunda mevcûde âlât-ı ma‘lûme-i mezkûre dört sehm i‘tibârıyla iki sehmi Aci Yordam zimmînin ve iki sehmi mersûm Yuvan zimmînin irsen ve şirâen müddet-i vâfireden beri yedinde emvâli olduğunu hâzırân-ı mersûmândan her biri meclis-i şer‘de alâ-tarîki’ş-şehâde haber vermeleriyle vâki‘u’l-hâl hıfzen li’l-makāl işbu vesîka-i enîka bi’t-taleb ketb ü tahrîr ve li-ecli’l-istihkâm mersûm Yuvan zimmî yedine i‘tâ olundu. Fî 29 Ş sene [1]242. Şühûdü’l-hâl: Muhzır Mehmed Çelebi, Muhzır Ebûbekir Çelebi, Muhzır Ali Çelebi.