Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 418 Hüküm no: 488 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahlas v. Kuzican’ın Van kasabasındaki bağın yarısını satması Van’da mübâya‘a, 750 guruş Vilâyet-i Anadolu’da Van kasabası hâricinde vakıf toprağı re‘âyâsından olup mahmiye-i İstanbul’da Gedikpaşa kurbünde mütemekkin Mahlas v. Kuzican zimmî tarafından husûs-ı âti’l-beyânda ikrâra vekîl olduğu Melkon v. İnbad ve Mahlas v. Avadis zimmîler şehâdetleriyle sâbit olan Kirkor v. Sarıhan zimmî meclis-i şer‘-i hatîr-i lâzımü’t-tevkīrde işbu hâmilü’r-rakīm kendinden asıl ve karındaşı Sahak zimmî tarafından husûs-ı âtîde tasdîka vekîl-i şer‘îsi Kuzican evlâd-ı Mağsis zimmî muvâcehesinde bi’l-vekâle ikrâr-ı tam ve takrîr-i kelâm edip müvekkilim mersûm Muhlis zimmî müstakıllen yedimde mülk ve hakkım olup zikr olunan vakıf toprağında vâki‘ ma‘lûmü’l-hudûd bir bâb mülk menzil ve ma‘lûmü’l-hudûd bir kıt‘a kürûmu mülk bağımın nısflarını yedimde ibkā ve nısf-ı âharlarını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm Sahak ve Kuzican zimmîlere ale’l-iştirâki’s-seviyy yedi yüz elli guruşa bey‘ ve temlik ve mahâllinde zabta tarafımdan mersûmânı taslît eylediğimde onlar dahi ber-vech-i muharrer iştirâ ve temellük ve kabûl eylediklerinden sonra semeni olan meblağ-ı mezbûr yedi yüz elli guruşu müşteriyân-ı mersûmân bana def‘ ü teslîm ben dahi yedlerinden tamamen ahz ü kabz eyledim fîmâ-ba‘d emlâk-ı muharrere-i mezkûrelerin nısfları mersûmân Sahak ve Kuzican zimmîlerin ale’l-iştirâki’s-seviyy mülk-i müşterâları ve hakk-ı sırfları olup benim nısflarında kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika da‘vâdan mersûmân Sahak ve Kuzican zimmîlerin zimmetlerini kabûllerini hâvî ibrâ ve iskāt eylediğimde onlar dahi ber-vech-i muharrer ibrâ-yı mezkûrumu kabûl eylediler dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.] Fî 5 L sene [1]242. Şühûdü’l-hâl: Muhzır Emin Çelebi, Muhzır Ali Çelebi, Makdis Karabet, Bağdisar, Malhas, Kirkor