Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 419 Hüküm no: 489 Orijinal metin no: [77b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Hasan’ın vasiyeti ve Tatar Hasan Ağa’yı vasi tayin etmesi Vasiyet Mahmiye-i İstanbul’da Dîvânyolu’nda Süleyman Paşa Hanı kurbünde Sinanağa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Rukiye bt. Hasan nâm Hatun meclis-i şer‘-i şerîf-i enverde li-ebeveyn karındaşı oğlu ve zikri âtî vesâyâsını tenfîze vasîyy-i muhtâr nasb ü ihtiyâr eylediği işbu bâ‘isü’l-vesîka Tatar Hasan Ağa b. Ahmed mahzarında ikrâr-ı tam ve takrîr-i kelâm edip ben bi-emrillâhi te‘âlâ vefât eylediğimde cemî‘ terekemi ve zimem-i nâsda olan hukūkumu merkūm Tatar Hasan Ağa ahz ü kabz edip ben zât-ı zevc olmadığım ecilden mikdâr-ı kifâye meblağ ile techîz ve tekfînim görüp düyûn-ı müsbetem zuhûr eder ise ba‘de’l-edâ bâkī kalan terekemin sülüsünü ifrâz ve sülüs-i mezkûrdan yüz guruşa bir mushaf-ı şerîf iştirâ olunup müstahıkkīnden bir kimesneye verile ve sülüs-i mezkûrdan fazla kalır ise fazla-i mezkûra vasîm mezbûr yediyle vücûh-ı birr ü hayrâta harc ü sarf oluna deyü vasiyet ve tenfîzine merkūm Tatar Hasan Ağa’yı vasîyy-i muhtâr nasb ü ta‘yîn eyledim dedikde, ol dahi ber-vech-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a [bi’t-taleb ketb olundu.] Fî 7 L sene [1]242. Şühûdü’l-hâl: Yorgancı Mehmed Ağa, Ebûbekir Çelebi el-muhzır, Terlikçi Hüseyin Ağa, Mehmed Nuri Ağa, Muhzır Emin Çelebi