Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 419 Hüküm no: 490 Orijinal metin no: [77b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Topçu Mehmed’in Niğde’nin Kayaardı mevkiinde bulunan bağ hissesini satması
Bağ mübâya‘ası
Vilâyet-i Anadolu’da Niğde kazâsında Sultan Alâaddin mahallesi ahâlisinden olup mahmiye-i İstanbul’da Çarşamba pazarı kurbünde sâkin Topçu Mehmed b. İbrahim meclis-i şer‘-i şerîf-i enverde işbu bâ‘isü’l-vesîka Lağımcı Mehmed b. Mustafa mahzarında ikrâr-ı tam ve takrîr-i kelâm edip kazâ-i mezbûra tâbi‘ Kayaardı nâm mahâlde vâki‘ Kalaycıoğlu bağı demekle meşhûr bir tarafdan Akkaşoğlu Hasan bağı ve bir tarafdan Akkaşoğlu Mustafa bağı ve bir tarafdan dağ ve bir tarafdan tarîk-i âm ile mahdûd sekiz seki ta‘bîr olunur bir kıt‘a mülk bağ dört sehm i‘tibârıyla iki sehmi benim ve birer sehmden iki sehmi kız karındaşlarım Afife ve Fatıma’nın yedimizde mülkümüz olmağla ben bağ-ı mahdûd-ı mezkûrda ber-i‘tibâr-ı mezkûr mâlik olduğum iki sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile merkūm Lağımcı Mehmed’e altmış guruşa bey‘ ve temlik ve mahâllinde vech-i lâyıkı üzere zabta tarafımdan merkūmu taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr altmış guruşu müşteri-yi merkūm bana def‘ ü teslîm ben dahi yedinden tamamen ahz ü kabz eyledim. Fîmâ-ba‘d bağ-ı mahdûd-ı mezkûrun ber-i‘tibâr-ımezkûr iki sehmi merkūm Lağımcı Mehmed’in mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezbûrun tağrîr ve gabnine müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dediklerinde gıbbe[‘t-tasdîki’ş-şer‘î mâ-vaka‘a bi’t-taleb ketb olundu.]
Fî 5 L sene [1]242.
Şühûdü’l-hâl: Hacı Osman oğlu Yahya, Yakub oğlu Ömer, Halim oğlu Ömer, Torunoğlu Mustafa, Muhzır Mehmed Çelebi, Muhzır Ebûbekir Çelebi, Muhzır Emin Çelebi, Hafızoğlu Mehmed.
|