Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 420 Hüküm no: 492 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hüseyin’in eşi Mustafa Dede’den muhâlaa usulüyle boşanması Husûs ile muhâla‘a, Husûs-ı âti’l-beyânın mahâllinde ketb ü tahrîri için savb-ı şer‘-i enverden bi’l-iltimâs irsâl olunan Boluvîzâde müderrisîn-i kirâmdan Mevlana es-Seyyid Mehmed Kâmil Efendi mahmiye-i İstanbul’da Topkapı kurbünde Bâyezid Ağa mahallesinde Mevlevîhâne dervişânından Mustafa Dede b. Mehmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde menzil-i mezbûrda sâkine ve zâtı Müslimûn ta‘rîfleriyle mu‘arrefe Hadice bt. Hüseyin nâm hatun meclis-i ma‘kūd-ı mezkûrda zevc-i muhâlı‘ı işbu bâ‘isü’l-vesîka merkūm Mustafa Dede mahzarında ikrâr-ı tam ve takrîr-i kelâm edip merkūm Mustafa Dede zevc-i dâhilim olup lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan seksen beş guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim merkūm Mustafa Dede ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru kabûl edip hukūk-ı zevciyete ve ibtidâ-yı zevciyetden işbu târih-i kitâba gelince sâir cereyân eden cemî‘ hukūk-ı şer‘iyeye müte‘allika da‘vâdan her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe’t-tasdîki’ş-şer‘î vâki‘ hâli mevlana-yı merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 5 L sene [1]242. Şühûdü’l-hâl: Muhzır Emin Çelebi, İmâm-ı mahalle Mehmed Ârif Efendi, Müezzin el-Hâc Mustafa Efendi, Mehmed Ağa b. İsmail, Mehmed Sadık Dede, İbrahim b. İbrahim, Mehmed Said b. Abdullah, Ali Ağa b. Ali.