Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 422 Hüküm no: 494 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marangoz Kalfası Dimitri’nin Gelibolu’nun Maydos köyündeki bağını satması Bağ mübâya‘ası, 100 guruş Sevâhil-i Bahr-ı sefîd’de Gelibolu kazâsına tâbi‘ Maydos karyesi re‘âyâsından olup medîne-i Üsküdar’da Yenimahalle’de mütemekkin neccâr kalfalarından Dimitri v. Lanberaki zimmî meclis-i şer‘-i şerîf-i lâzımü’t-tevkīrde yine karye-i mezbûre re‘âyâsından <> hâmilü’r-rakīm diğer Dimitri v. Panayot zimmî muvâcehesinde ikrâr-ı tam ve takrîr-i kelâm edip akd-i âti’z-zikrin sudûruna değin müstakıllen yedimde mülk ve hakkım olup mârrü’z-zikr Maydos karyesi bağları hilâlinde vâki‘ bir tarafdan Yorgi zimmî bağı ve iki tarafdan Varta zimmî bağı ve bir tarafdan Tanaş zimmî bağı ile mahdûd tahmînen bir buçuk dönüm mikdârı kürûmu mülk bağımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mersûm diğer Dimitri zimmîye yüz guruşa bey‘ ü temlik ve mahâllinde zabta tarafımdan müşteri-yi mersûmu taslît eylediğimde ol dahi ber-minvâl- i muharrer iştirâ ve temellük ve kabûl eyledikden sonra semeni olan meblağ-ı mezbûr yüz guruşu müşteri-yi mersûm diğer Dimitri zimmî yedinden tamamen ahz ü kabz eyledim, min-ba‘d bağ-ı mahdûd-ı mezkûr mersûm diğer Dimitri zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini ibrâ ve iskāt eyleyip ve her birimiz ber-vech-i muharrer âharın ibrâsını kabûl eyledik dedikde gıbbe’[t-tasdîki’ş-şer‘î mâ-vaka‘a bi’t-taleb ketb olundu.] Fî 10 L sene [1]242. Şühûdü’l-hâl: Molla Ebûbekir Çelebi el-muhzır, İbrahim Çelebi, el-Muhzır, Neccâr Lanbo v. Danyel, Neccâr Gaytan v. Esterati, Neccâr Dimitri v. Yorgaki.