Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 423 Hüküm no: 496 Orijinal metin no: [78a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdurrahman’a çocuğunu doğuruncaya kadar eski eşi tarafından nafaka tahsis olunması Haml-i nafaka, 13 guruş Mahmiye-i İstanbul’da Yenibahçe kurbünde Hürrem Çavuş mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan işbu bâ‘isetü’l-vesîka Âişe bt. Abdurrahman nâm hatun meclis-i şer‘-i şerîf-i enverde zevc-i sâbıkı Mehmed b. Ali mahzarında ikrâr-ı tam ve takrîr-i kelâm edip merkūm Mehmed ile zevciyet beynimizde kāime iken merkūmun firâşından hâsıl [78b] hâlâ hamlim olmağla vaz‘-ı haml ile iddetim münkaziye oluncaya değin kendi nafakam için zevcim merkūm Mehmed üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi mezbûre Âişe Hatun’un vaz‘-ı haml ile iddeti münkaziye oluncaya değin kendi nafakası için zevci merkūm Mehmed üzerine târih-i vesîkadan beher mâh on üçer guruş farz ve takdîr buyurup meblağ-ı mefrûz-ı mezkûru kendi nafaka ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer zevci merkūm Mehmed üzerine rücû‘a mezbûre Âişe Hatun’a izin vermeğin mâ-vaka‘a [bi’t-taleb ketb olundu.] Fî 29 N sene [1]242. Şühûdü’l-hâl: Muhzır Ali Çelebi, Çavuş Süleyman b. Mustafa, Birinci Onbaşı Osman Ağa b. Mehmed Salih, Muhzır Emin Çelebi.