Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 424 Hüküm no: 497 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katipzade Ahmed Efendi’nin Hacı Ahmed Efendi’nin miras hususunda Mehmed Beşe’yi vekil tayin etmesi Husûs ile kabûlüne mevkūfe vekâlet. Husûs-ı âti’l-beyânın mahâllinde ketb ü tahrîri için cânib-i şer‘-i kavîmden bi’l-iltimâs irsâl olunan Mevlana es-Seyyid Mehmed Kâmil Efendi mahmiye-i İstanbul’da Sultan Selim Câmi‘-i şerîfi kurbünde vâki‘ medîne-i İzmir hânedânından Ser-bevvâbîn-i Dergâh-ı âlî Kâtipzâde Ahmed Efendi b. Müderrisîn-i kirâmdan el-Hâc Osman Efendi b. Ahmed Beyefendi’nin sa‘âdet-hânelerine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde mûmâ-ileyh Ahmed Efendi meclis-i ma‘kūd-ı mezkûrda takrîr-i kelâm ve ta‘bîr ani’l-merâm edip birâderim olup bundan akdem fevt olan el-Hâc Mehmed Ağa’nın zevce-i menkûha-i metrûkesi Vesile Hanım bt. Abdullah ile sulbî kebîr oğlu Osman Efendi ve sulbiye kebîre kızı Sıdıka Hanım zimmetlerinde her biri âharın zimmetine lâzım gelen meblağa kefîl ve zâmin olmak üzere malımdan ve yedimden bi’l-ma‘iye ikrâz ve kabz eyledikleri bâ-temessük otuz bin guruş alacak hakkım olup meblağ-ı mezbûr otuz bin guruşun sülüsü olup mezbûre Sıdıka Hanım’ın hissesine isâbet eden on bin guruşu mezbûre Sıdıka Hanım’dan kable’l-ahz ve’l-istifâ mezbûre Sıdıka Hanım vefât edip tereke-i vâfiyesini medîne-i mezbûrede sâkin zevci Mehmed Sadullah b. Mustafa ile sadrî sagīr oğlu Mehmed bi’l-verâse kabz etmeleriyle ısdâr ettirdiğim fermân-ı âlî mûcebince on bin guruşu mahâllinde tereke-i müteveffât-ı mezbûreye vâzı‘ü’l-yed olan zevci mezbûr Mehmed Sadullah ile oğlu mezbûr Mehmed’in vasîsinden taleb ve da‘vâ ve ahz ü kabza ve makbûzunu bana irsâl ve teslîme ve husûs-ı mezkûr mütevakkıf olduğu umûrun küllîsine tarafımdan hâlâ medîne-i İzmir’de sâkin Sabuncu el-Hâc Numan Efendizâde <> işbu bâ‘isü’l-kitâb Mehmed Beşe’yi kabûlüne mevkūfe vekîl nasb ü ta‘yîn eyledim dediğini Mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 7 L sene [1]242. Şühûdü’l-hâl: İbrahim Efendi b. Ahmed, el-Hâc Davudzâde Yeğeni Şerif Mehmed b. Osman, Kâtib Mehmed Efendi, İmâm Mustafa Efendi.