Mahmudpaşa Mahkemesi 1 Numaralı Sicil (H. 1240-1242 / M. 1825-1827) cilt: 91, sayfa: 428 Hüküm no: 502 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ürgüb kazasından Yorgi’nin taşçılık ücretinden kardeşinde alacağı kalmadığı Her biri ibrâ hücceti Vilâyet-i Anadolu’da Nevşehir sancağında Ürgüb kazâsı re‘âyâsından olup mahmiye-i İstanbul’da Kumkapı kurbünde mütemekkin Yorgi v. Marat zimmî meclis-i şer‘-i hatîr-i lâzımü’t-tevkīrde karındaşı işbu hâmilü’r-rakīm Nikola evlâd-ı Marat zimmî muvâcehesinde ikrâr-ı tam ve takrîr-i kelâm edip ben karındaşım mersûm ile altı sene taşçılık san‘atında ücret mukāvelesiyle âhara hizmet ve ücretimizi ahz ve bir yere halt ve mekûlât meşrûbâtımızı andan rü’yet ve bâkīsi karındaşım mersûmun yedinde kalmağla benim hakkım olup karındaşım mersûmun yedinde bâkī kalan ma‘lûmü’l-mikdâr meblağı dahi karındaşım mersûm benim emrimle benim düğünüme harc ü sarf edip ol-vechile benim karındaşım mersûm zimmetinde bir akçe ve bir habbe hakkım ve alacağım bâkī kalmamağla husûs-ı mezkûra ve hukūk-ı mîrâsa ve sâire müte‘allika da‘vâdan karındaşım mersûm Nikola zimmînin zimmetini ibrâ ve iskāt eylediğimde ol dahi ber-vech-i muharrer ibrâ-yı mezkûrumu kabûl eyledi dedikde, gıbbe’t-tasdîki’ş-şer‘î mâ-vaka‘a [bi’t-taleb ketb olundu.] Fî 4 L sene [1]242. Şühûdü’l-hâl: Muhzır Ali Çelebi, Muhzır Ebûbekir Çelebi, Simyon, Usta Karabet, Usta Anaştaş, Usta İstefan, Todoros, Vasil v. Zaharya.