Bab Mahkemesi 54 Numaralı Sicil (H. 1102 / M. 1691) cilt: 20, sayfa: 152 Hüküm no: 148 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın Ahmed Sipahi b. Mustafa’dan aldığı beygiri iade etmesi Tokat kazâsına tâbi‘ İbrac nâm karye ahâlîsinden Ahmed Sipâhi b. Mustafa meclis-i şer‘-i şerîf-i enverde, sâbıkan İvaz ismiyle müsemmâ Ali b. Abdullah mahzarında üzerine da‘vâ ve takrîr-i kelâm edip, mezbûr Ali beş sene mukaddem hizmetimde iken menzilimden otuz guruş kıymetli bir re’s doru Bârgirimi bi gayri hakkın ahz u kabz etmiş idi. Hâlâ suâl olunup mevcûd ise aynı müstehlek ise ba‘de’s-sübût kıymet-i şer‘iyyesi alıverilmek matlûbumdur dedikde, gıbbe’s-suâl ve akībe’l-inkâr, müdde‘î-i mezbûrdan müdde‘âsına beyyine taleb olundukda, medîne-i mezbûre ahâlîsinden diğer Ahmed Sipâhi b. Lütfi ve Kırama? nâm karye ahâlîsinden Mustafa Sipâhi b. Sefer nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-vâki‘ mezbûr Ali beş sene mukaddem müdde‘î-i mezbûrun hizmetinde iken karye-i mezbûre menzilinden zikri mürûr eden doru Bârgiri bizim huzûrumuzda bi gayri hakkın ahz u kabz eyledi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe ri‘âyeti şerâiti’l-kabûl şehâdetleri makbûle olmağın, mûcebince mârru’z-zikr Bârgir mevcûd ise aynı, müstehlek ise ba‘de’s-sübût bedel-i şer‘iyyesi müdde‘î-i mezbûra devr ve teslîme mezbûr Ali’ye tenbîh olunup, mâ hüve’l-vâki‘ bi’t-taleb ketb olundu. Fî gurreti Cumâdelâhir sene 1102. Şuhûdü’l-hâl: Mübâşir el-Hâc Mustafa, İbrahim Çelebi [b.] Ahmed, Mehmed b. Derviş, Ahmed b. Ahmed, Mustafa [b.] Şaban.